Мыраан быыһыгар чарааһаабыт хаар ньуура бэрт кыраттан иҥнэ сытан чөмчүүк таас күлүмүн оонньотор, курустаал таас кырыытыгар сардаҥа уота сасыһа оонньуур, мэник-тэник оҕолуу итинэн чаҕылыйар, манан умайыктанар. Халыҥ тыа харабыла, аар тайҕа абырала тэҥкэ тиит өссө биир кырыа кыһыны этэҥҥэ туораатым, тоҥтон толлубатым, тымныыттан чаҕыйбатым, силлиэттэн сиҥнибэтим диирдии силиһигэр тиийэ эҥсэн дириҥник тыынан һуу гынна, лабааларын хамсатта.
Бэс чагдаҕа бэртээхэй да кэм кэллэ диэн сэгэччи буолбут бэс мастар суугунаһа түстүлэр, хатыҥ чараҥҥа хата диэ диэбиттии хотун хаан хатыҥнар хамсаан ыллылар, хаарыстарын, солколорун суугунас тыаһын санаан хантас гыннылар, саҥа былаат бааныахпыт, сайбаччы хаамыахпыт дэһэрдии лабааларынан даҕайсан тэбэнэттик күлүстүлэр. Иирэ талах илии илииттэн ыга ылсан сааскы халаан уутун көрсөргө бэлэмнэнэр, угуттуур уу долгунугар оҕустарбаттыы ыга тутуһар. Тыллар-тиллэр кэмэ чугаһаан тыыллаҥнаан, түллэҥнээн уһуктуо, күөххэ үктэннэриэ, көбүөргэ хаамтарыа! Тугун баҕас кэрэтэй, тоҕо баҕас күндүтэй! Төрүөтэ суох үөрүүттэн мичээр сэбэрэбитигэр олохсуйдун, кыраттан да кынаттаныаҕыҥ, дуона да суохтан долгуйуоҕуҥ, сап да саҕаттан салҕаныаҕыҥ.
Хаартыска: https://kartin.papik.pro/vesna/12587-kartinki-vesna-v-jakutii-70-foto.html
-
0
-
0
-
0
-
0
-
0
-
0
