Төрөөбүт тыл олимпиадатыгар сүүмэрдиир түһүмэххэ түүр тыллаах алта эрэгийэнтэн барыта 200 оҕо кыттыбыт. Кинилэртэн саамай чулуулара, 30 оҕо талыллан, ыам ыйын 2-3 күннэригэр Алтаай Өрөспүүбүлүкэтигэр ыытыллыбыт эрэгийиэннэр икки ардыларынааҕы төрөөбүт тыл үһүс олимпиадатыгар кыттыбыттар.
Татарстан, Алтай, Бүрээтийэ, Башкортостан бэрэстэбиитэллэрин таһынан, Саха Өрөспүүбүкүлэтиттэн түөрт оҕо: Валентина Васильева (Ньурба), Каролина Аллагузина (Амма), Светлана Слепцова (Чурапчы), Эрэл Потапов (Дьокуускай) кыттыбыттар. Кинилэри учууталлара Наталья Рязанская, Зоя Сивцева, Саргылаана Ноева, Елена Бурцева арыаллаан илдьэ сылдьыбыттар.
Хас биирдии оҕо төрөөбүт тылга аналллаах бырайыагы көмүскээбит уонна уус-уран айымньыны састааптарынан арааран, ырытыы оҥорбут. Ол туһунан, Валентина Васильева маннык кэпсиир:
– Мин Ньурба улууhун Маалыкай орто оскуолатын 10 кылааhыгар үөрэнэбин. Олимпиадаларга тохсус кылаастан кыттабын. Оҕо аан бастаан туохха барытыгар төрөппүттэриттэн үөрэнэр, биһиги бииргэ төрөөбүт төрдүөбүт. Сахалыы уус-уран айымньыны ааҕарга төрөппүттэрбит үөрэппиттэрэ. Кылааспыт салайааччыта Елена Васильевна Бурцева биһиэхэ саха тылын уонна литературатын үөрэтэр. Олимпиадаҕа баай тыллаах-өстөөх, холкутук саҥарар, саха суруйааччыларын айымньыларын билэр оҕо кыттар. Миэхэ Иван Гоголев Саха сирин туһунан айымньыта түбэспитэ. Бу патриотическай хоһоону эрдэ аахпыт буоламмын, син суруйа сатаабытым уонна ыйытыыларга барытыгар хоруйдаабытым. Бэйэм Өксөкүүлээх Өлөксөй, Амма Аччыгыйа, Семен уонна Софрон Даниловтар, Николай Якутскай, Николай Тобуруокап айымньыларын сөбүлээн ааҕабын.
Валентина Васильева үһүс миэстэни ылан, кыайыы көтөллөөх кэлбит. Дьэ, ити курдук оҕолорбут араас таһымнаах күрэхтэһиилээргэ кыттан, төрөөбүт ийэ тылбытын уонна дойдуларын ааттаталлар. Сахабыт тыла кэскиллээҕин өссө төгүл бигэргэттилэр.
-
8
-
2
-
0
-
0
-
0
-
0
