Дойду үрдүнэн ыытыллар «Ийэ дойдуга бэриниилээх буолуу» уруоктарыгар холбоһон, оскуолаларга уонна мусуойдарга анал уруоктар бардылар. Быйылгы быһыыга-майгыга олоҕуран өрөспүүбүлүкэ үрдүнэн миитиннэри ыытыыга таатталар биир санаанан холбостубут.
Кыайыы күнүн сарсыардата улуус баһылыга Айаал Семенович Бурцев тыыл бэтэрээннэрин, сэрии сылларын оҕолорун кытары көрсүһүүтүттэн саҕаланна.
Бу өрөгөйдөөх күн күндү ыалдьыттарынан ааспыт уодаһыннаах сэрии иэдээнин билбит, кыайыыны уһансыбыт тоҕус тыыл бэтэрээнэ уонна сэрии кэмин оҕолоро буоллулар.
Ол сыллары санатардыы, кыайыы мээнэҕэ кэлбэтэҕин бигэргэтэн, халлаан тымныы салгынынан көрүстэ. Кыайыы Болуоссата олохтоохторунан туолан, үйэлэргэ сөҥөн турар албан ааттаах дьоммутун кытта алтыста. Ыччат дьон эйэлээх олоҕу аҕалсыбыт эһэтин, хос эһэтин мэтириэтин тутан сүгүрүйэр бэлиэтин биллэрэн «Өлбөт үйэлээх пуолканан» хаамта.
Миитиҥҥэ улуус баһылыга Айаал Бурцев, Таатта нэһилиэгин баһылыга Егор Павлов, улуустааҕы бэтэрээннэр Сэбиэттэрин бэрэссэдээтэлэ Маргарита Попова, ыччаттар ааттарыттан Иван Старостин, анал байыаннай дьайыы кыттыылааҕа Роман Бондарев эҕэрдэ тылы эттилэр.
Ол кэнниттэн итии чэйдээх «Саллаат хааһыта», эҕэрдэ кэнсиэр тэриллэн, бырааһынньык тыынын дириҥэтэн биэрдилэр.
Үгэс буолбут «Өйдөбүнньүк чүмэчитин» уматыы тэриллэн, бүгүҥҥү үйэлээх тэрээһини түмүктээтэ.
Улуу Кыайыыны аҕалсыбыт биир дойдулаахтарбыт ааттара, үйэттэн-үйэҕэ, көлүөнэттэн-көлүөнэҕэ ааттана турдун!
-
7
-
1
-
0
-
0
-
0
-
0
