Ил Дархаммыт А.С. Николаев оттооһун уустугурбутунан, кэккэ улуустарга ыксаллаах быһыыны-майгыны биллэрдэ. Ол сөп. Бырабыыталыстыба бэйэтин өттүттэн туох кыалларын оҥоруо, тыа хаһаайыстыбатынан дьарыктанааччыларга сөптөөх көмө көрүллүө. Үөһэттэн туох көмө кэлэрин кэтэһэн олорбокко, миэстэтигэр олохтоох дьаһалталар, тула түмсэн, туох баар ис күүстэри түмэн, атырдьах ыйыгар бары кыаҕы эбии оттооһуҥҥа ууруохха диэн ыҥырабын.
Кистэл буолбатах, токур илии хотуурун "тоҕоһоҕо ыйаабыппыт" ыраатта. Аныгы үйэ сиэринэн, тиэхиньикэҕэ убаммыппыт баар суол. Ол түмүгэр сыллата үрэхтэрбит оттоммоттор, ходуһаларбыт, тыраахтар киирбэт диэн сылтаҕынан, дулҕаланан, талахтанан, сэтиэнэхтэнэн, кыараан иһэллэр. Быйыл илии хотуурун күүскэ туһаннахпытына, эһиилги да кураан дьылга бэлэмнэнии курдук буолуо этэ. Сэтиэнэх аҕыйыа, талах, дулҕа сарбыллыа, ходуһа иэнэ кэҥиэ. "Отонноотоххо -- оҥоойук туолар" диирбит курдук, тирбэҕэлэһэн оттоотохпутуна, эбиискэ буолуо этэ.
Улуус, нэһилиэк дьаһалталара тыа хаһаайыстыбатын исписэлиистэрэ үчүгэйдик ааҕынан, оттоммот сирдэри ыйан биэрэн, кэмигэр болдьох туруоран аһан, ураты харыстанар сирдэргэ эмиэ оттууру көҥүллээн, о.д.а. уталытыллыбат дьаһаллары ылыныахтарын наада.
Ыччат илии звеноларын тэрийэр, улууска баар тэрилтэлэри урукку курдук хаһаайыстыбаларга көмө быһыытынан субуотунньукка таһаарар тоҕо кыаллыбат буолуой?! Мобильнай биригээдэлэр (уруккунан – звенолар) ыраах сирдэргэ оттуу баралларыгар 50 % муниципальнай бырагырааманан тиэхиньикэ, сэлээркэ ылалларыгар көмөлөһүү эмиэ улахан өйөбүл буолуо этэ.
Ил Дархан таһаарбыт дьаһалын толорорго олорон биэрбэккэ, атырдьах ыйын илиинэн оттооһун ыйынан биллэрэн, кыстыгы этэҥҥэ туоруур гына дьаһаныаҕыҥ!
Андрей Находкин,
Ил Түмэн тыа сиригэр уонна аграрнай бэлиитикэҕэ сис кэмитиэтин салайааччы.
-
0
-
0
-
0
-
0
-
0
-
0
