Чэчик чэмэлийэр иэдэһигэр таммах уу чоҕулуҥнуо, сэбирдэх сэбэрэтин сарсыардааҥҥы сиик сэрэниин сэрэнэн сууйуо- сотуо. Хонууга,сыһыыга хоммут түүҥҥү чуҥкунуур чуумпу улам-улам сэргэхсийиэ, алаас хотуна хатыҥ мастар оргууй наллаан ибир- сибир сэһэргэһиэхтэрэ, сайын устата сиппит-хоппут, силигилии үүммүт хахыйахтар дьылыгырас уҥуохтаах, тэбэнэттээх харахтаах, дьээбэлээх- хооболоох сайылык кыргыттарын саната сиэттиспитинэн сэргэстэһэ хаамтылар, бэрт дуона да суохтан сыһыгыраһа күлүстүлэр, тилигирэһэ үүммүт титириктэр даҕаны хаалсыбатылар отчут уолаттары саната чобуо чобуотук тутуннулар, кыайардыы- хотордуу хоһууннук хамсаннылар. Кыыһа буспут кыһыл хаптаҕас ыаҕайаны толордо, онтон мин уочаратым диирдии моонньоҕон кыламанын быыһынан хараарчы көрүө, миигин эмиэ умнумаҥ диирдии сугун күп күөҕүнэн көрүө... Эмтээх от эгэлгэтэ кэмиттэн-кэмигэр тыллыа- тиллиэ, ситиэ- хотуо, туһалыырга тоҕоостоох буолуоҕа.
Бу барыта дойдубут барахсан аар айылҕатын баайа- дуола, уйгута- быйаҥа! Саха буоларгынан киэн тутун, төрөөбүт төрүт дойдугар төрүт тылгынан тото-хана кэпсэт, төрүт дьонуҥ төлкөлөөх толкуйун тобул. Санаабытыҥ сатаннын, туппутуҥ тубустун, ылсыбытыҥ ыраахха тириэртин. Саҥа күнүнэн сэгэрдээр!
Хаартыска: эрэдээксийэ архыыбыттан.
-
0
-
0
-
0
-
0
-
0
-
0
