Госдумаҕа дьокутааттар психоневрологическай интэринээттэринэн ыарыһахтар бырааптарын көмүскүүр туспа уонна судаарыстыбаттан тутулуга суох сулууспалары тэрийэри тохтотор туһунан федеральнай сокуоҥҥа уларытыылары киллэрэргэ куоластаатылар. Маннык сокуон барыла от ыйын 20 күнүгэр иккис уонна үһүс ааҕыыга ылылынна.
Саҥа уларыйыылар «Психиатрическай көмөнү оҥоруу уонна гражданнар бырааптарын мэктиэлиир туһунан» федеральнай сокуоҥҥа киллэрилиннилэр. Чуолаан, сокуон 38 ыстатыйата көтүрүллэр. Ол курдук, судаарыстыбаннай былаас уорганнарыттан тутулуга суох психоневрологическай интэринээттэргэ ыарыһахтар бырааптарын көмүскүүр сулууспалары тэрийии туһунан этии сотуллар. Дьиҥэр, бу сулууспалар бэрэстэбиитэллэрэ ыарыһахтар бырааптарын көмүскүүллэр, этиилэрин ылыналлар, интэринээт салалтатын кытта ыкса боппуруостары быһаараллар эбэтэр былаас уорганнарыгар, ол иһигэр суукка кытары сайабылыанньалары хомуйан уонна бэлэмнээн ыыталлар этилэр.
Саҥа киирбит көннөрүүлэринэн, сокуон 46-с ыстатыйата эмиэ уларыйар. Ити курдук, бу ыстатыйаны бүтүннүү уларытар уонна психическэй ыарыылаахтар бырааптарын көмүскүүр усулуобуйалара ыйыллар. Ол курдук, ыарыһыахтар бырааптарын көмүскээһин эрэгийиэннээҕи былаас уорганнарыгар, туһааннаах гражданскай сулууспалаахтарга, уопсастыбаннай балаатаҕа, уопсастыбаннай кэтээн көрөр хамыыһыйаларга, судаарыстыбаннай юридическай бюроларга уонна адвокаттарга, ону тэҥэ уопсастыбаннай түмсүүлэргэ сүктэриллэр.
Санаттахха, сокуон барыла көрүллүөн иннинэ, «Вера» аһымал пуондатын тэрийээччитэ Нюта Федермессер дьокутааттарга 38-с ыстатыйаны көтүрүүнү уонна биирдиилээн киирэр көннөрүүлэри утаралларыгар этии көтөхпүтэ. Кини этэринэн, сокуон 38-с ыстатыйата көтүрүллэр түгэнигэр, 46-с ыстатыйанан психоневрологическай интэринээттэргэ ыарыһахтар бырааптарын көмүскүүр күүһэ сүтэр. Итини таһынан, судаарыстыбаттан тутулуктаммат туспа сулууспалары тэрийиини олохтообот, ыарыһахтар бырааптарын көмүскүүр бэрэстэбиитэллэргэ эбии боломуочуйаны биэрбэт, үҥсүүлэрин ылынарга уонна биирдиилээн сайабылыанньалары суукка киллэрэр кыах көрүллүбэт.
- Биир эмэ дьокутаат туттунара буолуо дии санаабытым. Эһиги сокуону оҥорор былаас буолаҕыт, ол эрэн, туох барыта ситэриилээх былаастан тутулуктанар дии саныыгыт. Хайдах итинник буолуон сөбүй? – диэн түмүккэ кэлбитин Нюта Федермессер биллэрдэ.
«Тулаайах оҕолорго көмө оҥорор волонтердар» аһымал пуонда бэрэсидьиэнэ Елена Альшанская сокуоҥҥа киирэр саҥа көннөрүүлэринэн психиатрическай көмө оҥорор кэммиэрчэскэйэ суох тэрилтэлэргэ дьиҥнээх хааччахтар киирэллэрин ыйда.
Тэрилтэ салайааччыта эбэтэр психиатр-быраас ыарыһахха тас эйгэни кытта төлөпүөнүнэн суруйсарын, киирэрин-тахсарын чахчы хааччахтыыр кыахтаналлар. Билигин баар сулууспалары суох оҥордохторуна, ыарыһах баардарын-суохтарын барытын былдьаттаҕына, холобур, хайдах туһааннаах гражданскай сулууспалаахтарга, уопсастыбаннай балаатаҕа, суруйуон дуу, ыҥырыан дуу, кэпсэтиэн дуу сөбүй?, - диэн Елена Альшанская ыйытык үөскүүрүн эттэ.
Хаартыска интэриниэт аһаҕас ситимиттэн туһанылынна.
-
1
-
0
-
0
-
0
-
0
-
0
