Общество

-- Олоҕум култуураны кытта ыкса быһаччы ситимнээх буолан, бүгүн докумуоннарынан сирдэтэн буолбакка, ис сүрэхпиттэн Михаил Ефимович уонна култуура туһунан этиэхпин баҕарабын.

1990-с сс. урукку барыта сууллар, ыһыллар-тоҕуллар кэмигэр Михаил Ефимович тыыннаах хаалар эрэ буолбакка, сайдыы суолун тутуспута. Оттон ол биир тирэнэр тирэҕэ - КУЛТУУРА буолбута.

Кини быһаччы дьаһалынан бүгүн биһиги "бу саха ускуустубатын тирэнэр тирэҕэ" диир дьоһуннаах инфраструктурабыт баар буолбута: Муусука үрдүкү оскуолата, кэлин үнүбүрсүөт буолбут АГУИКиКИ, хореография училищета, Опера уонна балет тыйаатыра, Кыыл Уолун аатынан үҥкүү судаарыстыбаннай тыйаатыра, о.д.а. Уопсайынан, дойду барыта ыһыллар-тоҕуллар, духуобунай ориентирдар умнуллар кэмнэригэр, биһиэхэ 20-чэ култуура тэрилтэтэ тэриллибитэ.

Ол эрээри, саамай сүрүнэ - оччолорго биһиги култуурабытын тутан хаалбыппыт. Төттөрүтүн, саха норуотун төрүт култуурата, үгэһэ самныахтааҕар өссө чэчирээбитэ, кини "көмүс кэмэ" үүммүтэ: Ыһыахпыт судаарыстыбаннай бырааһынньык буолбута, хомуспут, оһуохайбыт, Олоҥхобут ураты статустаммыта. Онтун ааһан, Олоҥхобут онтон тирэҕирэн Киһи аймах материальнайа суох култууратын чыпчаал айымньытынан билиниллибитэ. Төрөөбүт тыл күнэ, үөрэх кыһаларыгар "Музыка для всех", "Рисуем все" бырайыактар баар буолбуттара.

Ити барыта Михаил Николаев кэмигэр ылыммыт дьаһала-быһаарыыта билигин өрөспүүбүлүкэ тыынын тутан турар тыыннаах эйгэ буолан турарын туоһулуур.

Биир түгэни өйдөөн кэлэбин. 1995 с. арай биир күн Михаил Ефимович эрдэттэн тугу да сэрэппэккэ, кимиэхэ да эппэккэ кэллиэскэ Аграфена Дмитриевна хоһугар киирэн кэлбит. Соһуйуу-өмүрүү буолбут. Михаил Ефимович ону-маны туоһулаһан баран, аргыый сыыйан: "туохха наадыйаҕыт?", - диэн ыйыппыт. Аграфена Дмитриевна соһуччута бэрдиттэн төбөтүгэр туох киирбитин, сүрүн наадыйарын ааттаталаабыт. Онтон Михаил Ефимович: "сарсын испииһэктээн киллэрээриҥ", - диэн, кыратык кэпсэтэ түһэн баран, тахсан барбыт. Сарсыныгар, кыра мунньах кэннэ, испииһэк Михаил Ефимовичка киирбит. Соторунан кэллиэс материальнай-тиэхиньиичэскэй баазата хаҥаабыт, үчүгэй үөрэх тэрилэ кэлбит. Өссө биири санаан кэлбиччэ эттэххэ, ол түмүгэр, саҥа үөрэх аппаратурата кэлбитинэн, бу бүтэрэн бараары сылдьар, оччолорго өссө да устудьуоннуу сылдьар "Дапсы" бөлөх ыччаттарын эбии биир сыл кэллиэскэ хаалларан үөрэппиттэрэ. Оттон "Дапсы" аатын билбэт киһи суох буолбута.

Кэлин Михаил Ефимович кэллиэспит саҥа дьиэтэ арылларыгар кэлэн көрсөн, сүбэ, соргу, Алгыс тылын анаан барбыта. Кэллиэһи бүтүннүү кэрийэн көрбүтэ, бэрт элбэҕи, арааһы, үгүһү кэпсэппиппит. Билигин биһиги ону олус күндүтүк саныыбыт, сүрэхпитигэр мэлдьи илдьэ сылдьабыт.

Махтал буоллун Михаил Ефимовичка! Эн хаалларбыт нэһилиэстибэҥ бүгүн биһиги тыйаатырдарбытыгар, кулууптарбытыгар, оскуолаларбытыгар, ыһыахпытыгар, хас биирдии сыанаҕа тахсар киһи кутугар-сүрүгэр тыыннаах, баар, сайдыы сайдар кэскиллээх.

Сонун төрдө уонна хаартыска: Захар никитин МАКС ханаала.