Киэҥ ыҥырыылаах тэрээһиҥҥэ судаарыстыбаннай салайыы ситимигэр кыраасданнарга уонна биисинэскэ туһаайыллыбыт саҥа суоллары тобулуу туһунан дьүүллэһии барда. Сүрүн кэпсэтии сыыппара сиэрбистэрин уонна аныгы көрүүлэри тутуһан судаарыстыба уонна дьон бииргэ дьайыыларын хайдах судургутар туһунан тула барда. Пуорум Арассыыйа Федерациятын Бырабыыталыстыбатын уонна Красноярскай кыраай тэрийиилэринэн ыытылынна.
Өрөспүүбүлүкэ Судаарыыстыбаннай Мунньаҕын бэрэссэдээтэлэ Алексей Еремеев тэрээһин чэрчитинэн Красноярскай кыраай сокуону оҥорор Мунньаҕын бэрэссэдээтэлэ Алексей Додатконы кытта көрүстэ . Салайааччылар чугастыы сытар эрэгийиэннэр парламеннара инникитин бииргэ үлэлэһиилэрин туһунан кэпсэттилэр, сокуону оҥоруу процеһыгар, судаарыстыбаннай өҥөнү оҥоруу ситимигэр сыыппара инструменнарын киллэриигэ үлэлэрин билиһиннэрдилэр, уопуттарын атастастылар.
Ил Түмэн испиикэрэ пуорум түмүгүн туһунан билиһиннэрэригэр, былаас бары таһымнарыгар килийиэн туһатыгар олохтоммут бириинсиптэри киллэрии сүрүн стратегическай суолталаах диэн бэлиэтээтэ.
«Билигин киһини үрдүктүк тутуу кылаабынай буолла. Сыыппараҕа киирии билигин хайдах курдук тэтимнээхтик бара турарын көрө-билэ сылдьаҕыт: федеральнай өҥөнү оҥоруу үксүтэ электроннайга көһөрүлүннэ, толоруу болдьохторо хас да төгүл аччаата. Саха Сиригэр ол чааһыгар эрэгийиэн уонна муниципалитет сиэрбистэрин порталын кэҥэтии бара турар, улахан үлэ ыытыллар. Манна биһиги сорукпут- судаарыстыба уонна кырасданьыын бииргэ дьайыыларын олох судургу уонна табыгастаах оҥоруу», - диэн Алексей Ильич быһаарда.
Бэрэссэдээтэл салгыы чопчулаабытынан, пуорумҥа кыттыбыт дьон оҥоһук өй сайдыытын уонна үлэ ырыынагын трасформациялааһынын хайысхатын ордук болҕойоллор. Кини бэлиэтээбитинэн, атын эрэгийиэннэр сударыстыбаннай салайыыга оҥоһуу өйү киллэрэр уопуттарын Саха Өрөспүүбүлүкэтигэр ымпыктаан-чымпыктаан үөрэтиллиэхтээх, туттуллар кыаҕа туһаныллыахтаах. Испиикэр «Сыыппара сиэрбистэрин уонна МФЦ «биир түннүк» бириинсибин хоһулааан туттуу сарсыҥҥы күн буолбакка, билигин дьиҥ олоххо туттуллар көстүү. Ол, Саха Сирин олохтоохторун хаачыстыбатын уларытар», -диэн сөпкө санатта.
Хаартыскалар «Ил Түмэн» саайтан
-
0
-
0
-
0
-
0
-
0
-
0
