Чуолаан олохтоох дьаһалта баһылыктара, бэрэстэбиитэллээх уорганнар дьокутааттара уонна муниципальнай сулууспалаахтар сэлиэнньэлэр итиэннэ куораттар олохторун-дьаһахтарын тутаах боппуруостарын быһаарыыга күннэтэ сыралаһаллар.
Бүтүн Арассыыйатааҕы «Сулууспалааһын» муниципальнай бириэмийэ кинилэр үлэлэрин, ситиһиилэрин бэлиэтиир аналлаах. Бириэмийэ саҥа сезонун саҕалыыр туһунан РФ Бэрэсидьиэнин Дьаһалтатын салайааччыны бастакы солбуйааччы Сергей Кириенко салалтатынан ыытыллыбыт тэрийэр кэмитиэт мунньаҕынан быһаарылынна.
Саха Сириттэн ааспыт өттүгэр бу бириэмийэнэн Хаҥалас улууһун Тиит Арыы нэһилиэгин баһылыга Григорий Лукин ууга түспүт киһини быыһаабытын иһин бэлиэтэммитэ. Былырыын өрөспүүбүлүкэ 10 бырайыага дойду 200 бастыҥ бырайыагын иһигэр киирбитэ, Аида Трифонова (Мирнэй) дьиэ кэргэни, ийэ буолууну, оҕо аймаҕы өйүүр көҕүлээһинэ бириэмийэ лауреата буолбута. Маннык дьоннордоох буоламмыт, биһиги өрөспүүбүлүкэбит үүнэр-сайдар.
Саҥа сезоҥҥа тоҕус номинация көрүлүннэ, ол иһигэр «Цифровой муниципалитет – технологии для людей» диэн саҥа номинация киллэрилиннэ. Муниципальнай сообщества бэрэстэбиитэллэрин көхтөөхтүк кыттаргытыгар, бастыҥ бырайыактаргытын түһэрэргитигэр ыҥырабын. Сайаапкалары сэтинньи 29 күнүгэр диэри муниципалитеты.рф. порталга хомуйаллар. Хас биирдии улууска дойду бүттүүнэ билиэн сөптөөх үчүгэй көҕүлээһиннэр баалларыгар эрэбин. Барыгытыгар ситиһиилэри баҕарабын диэн Ил Дархан Айсен Николаев max.ru/aisen_nikolaev суруйда.
-
0
-
0
-
0
-
0
-
0
-
0
