От ыйын 19 күнүгэр Ил Түмэн дьокутааттарын быыбарыгар хандьыдааттары туруоруу түмүктэммитэ. Баартыйалар испииһэктэринэн 411 киһи алта баартыйаттан уонна 181 биир мандааттаах уокуруктарынан туруорулуннулар, диэн эрэгийиэннээҕи Киин быыбардыыр хамыыһыйата иһитиннэрбитэ.
Бу сырыыгы «КПРФ» баартыйа хамыыһыйаҕа хандьыдааттар испииһэктэрин тиһэх туттардылар. Быыбардарга «Биир Ньыгыл Арасыыйа», «КПРФ», «Сиэрдээх Арассыыйа - Кырдьык иһин», «ЛДПР», «Новые люди» уонна «Родина» баартыйалар кыттыахтарын баҕаралларын биллэрдилэр. Бэйэ туруорунааччыта тоҕус. Ити курдук биир мандааттаах уокуруктарынан конкуренцията – биир мандаакка 3 кыттааччылаах.
Саастарынан ылан көрдөххө, саамай эдэр кытааччы 21 саастаах, оттон аҕам саастааҕа - 79-таах. Парламентарий буолуон баҕарар дьахтар ахсаана эмиэ аччаабат, ол курдук быйыл баартыйа испииһэгинэн 103 дьахтар кыттар, эр киһитэ - 308, оттон биир мандааттаах уокуруктарынан дьахтара -40, эр киһитэ - 141.
Санаттахха, 2018 с. буолбут норуот дьокутааттарын быыбарыгар 29 кыттааччы Ил Түмэн урукку ыҥырыылаах парламентарийдара этилэр, онтон 41 кыттааччы саҥа талыллыбыттара. Онон ддьокутааттар куорпустара 58,6% саҥардыллыбыта.
СӨ Киин быыбардыыр хамыһыыйата быһаарыытынан, быйыл өрөспүүбүлүкэтээҕи уонна муниципальнай таһымнаах быыбардар үс хонуктаах буолуохтара, балаҕан ыйын 10,11,12 күннэригэр ыытыллыахтара. Сүрүн, ордук дьону долгутар, быыбардарга СӨ Ил Дарханын уонна Ил Түмэн дьокутааттарын талыахпыт. Быыбардааччылар 9 улууска оройуон баһылыктарын, итини таһынан 23 нэһилиэк баһылыктарын иһин куоластыахтара. Бэлиэтээн эттэххэ, муниципальнай таһымнаах быыбардар быйыл Жатайга, Үөһээ Бүлүүгэ, Аллайыахаҕа, Аллараа Халымаҕа, Өймөкөөҥҥө уонна Орто Халымаҕа эрэ ыытыллыбаттар.
-
2
-
0
-
0
-
0
-
0
-
0
