Бүгүн, муус устар 21 күнэ — олохтоох бэйэни салайыныы күнэ. Амма улууһун дьокутааттарын Сэбиэтин бэрэссэдээтэлэ Владимир Колосов олохтоох бэйэни салайыныы норуот бэйэтин олоҕун хайысхатын оҥосторугар, бэйэтин санаатын тириэрдэригэр кыаҕы биэрбитэ диэн бэлиэтиир Амма олоҕо саайт.
«РФ Бэрэсидьиэнэ Владимир Путин 2012 сыллааҕы дьаһалынан Бүтүн дойду үрдүнэн, муус устар 21 күнэ «Олохтоох бэйэни салайыныы» күнүнэн биллэриллибитэ уонна Арассыыйа биир саамай эдэр бырааһынньыктарыттан биирдэстэрэ буолар. Саха Өрөспүүбүлүкэтигэр 2002 сыллаахха олунньу 19 күнүгэр СӨ Бэрэсидьиэнин уурааҕынан олохтоох бэйэни салайыныы Сэбиэтэ тэриллибитэ уонна быыбар биллэриллибитэ, бу саҥа хайысханы олоххо киллэриигэ күүстээх үлэ саҕаламмыта. Бэйэни салайыныы олоххо киириэҕиттэн күн бүгүнүгэр диэри уларыйыылар киирэ тураллар. Ол курдук холобура кулун тутар 20 күнүгэр 33 нүөмэрдээх «Об общих принципах организации местного самоуправления в единой системе публичной власти» диэн федеральнай сокуон олоххо киирдэ. Ол быһыытынан Саха сиригэр икки таһымнаах былаас системата хааларын туһугар үлэ бара турар. Төһө да уларыйыылар киирдэллэр, олохтоох бэйэни салайыныы сүрүн сыала — олохтоох дьон интэриэстэрин көмүскүүрэ, кыһалҕалаах боппуруостарын үрдүкү салалтаҕа туруорсара сүппэт уонна уларыйбат. Бүгүҥҥү бэлиэ күнүнэн улууспут муниципальнай тэриллиилэрин ытыктабыллаах баһылыктарын, үлэһиттэрин уонна дьокутааттарын, муниципальнай сулууспа бэтэрээннэрин Арассыыйа Федерациятыгар Олохтоох бэйэни салайыныы күнүнэн итиитик-истиҥник эҕэрдэлиибит! Биир санаанан салайтаран, улууспут, Сахабыт Сирэ сайдыылаах, нэһилиэнньэ олоҕо уйгулаах буоларыгар бары бииргэ түмсэн салгыы үлэлиэҕиҥ-хамсыаҕын! Үгүс сыралаах үлэҕитигэр үрдүк ситиһиилэри, үтүө түмүктэри баҕарабын! Cанаабыккыт сатанан, толкуйдаабыккыт туолан олоххо киирэн истин, дьоҥҥут-сэргэҕит махтала күүскүтүгэр күүс биэрдин, кынат буоллун!», — диэн Владимир Владимирович санаатын уонна эҕэрдэтин тириэртэ.
Хаартыска: «Амма олоҕо», СИА
-
2
-
0
-
0
-
0
-
0
-
0
