Дьокуускай баһылыга Евгений Григорьев эппитинэн, федеральнай структураны уонна өрөспүүбүлүкэ бырабыыталыстыбатын кытта ыытыллыбыт улахан үлэ түмүгэнэн докумуон оҥоһуллубут. “Бырайыак портфелыгар 95 бырайыак киирэр. Үбүлээһин уопсай кээмэйэ – 470 млрд солк. тахса. 2030 сылга диэри бырайыактары барыларын олоххо киллэрэр былааннаахпыт. Дьокуускай 400 сыллаах үбүлүөйүн куораппыт уларыйан-тупсан көрсүөхтээх. Сүрүн уратыбыт – тымныыбыт. Температура сыллааҕы араастаһыыта – 102,8 кыраадыс. Биһиги куораппыт Уһук Илиҥҥэ түргэн тэтиминэн сайда турар. Кэлиҥҥи биэс сыл иһигэр нэһилиэнньэ ахсаана 8 %-нан улаатта”, – диэн баһылык эттэ.
Дьокуускай куорат Думатын бэрэссэдээтэлэ Альберт Семенов “Опорные точки роста: пространственное развития территорий” пуорум тиэмэтэ эрэгийиэн уратыларын кытта сибээстээн оҥорбуттарын бэлиэтээтэ. “Айылҕатын уонна килиимэтин уратыларын уонна нэһилиэнньэлээх пууннар бэйэ-бэйэлэриттэн ыраах сыталларын учуоттаан бу тиэмэ биһиги эрэгийиэммитигэр саамай тоҕоостоох”, – диэн бэлиэтээтэ.
Ставропольскай кыраай Андроповскай муниципальнай уокуругун баһылыга Нина Бобрышева: “Мин Саха сиригэр бастакыбын сырыттым. Бэл, туманнаах тымныы күннэргэ бэйэҕин табыгастаахтык сананаҕыҥ. Бу сыл алтынньытыгар Ставропольскай кыраайга эрэгийиэннээҕи тэрээһин буолбута. Арассыыйа араас куоратыттан дьон бөҕө тоҕуоруһа мустубута. Саҥаны-сонуну билэрбит, уопут үллэстэрбит олус наадалаах”, – диэн санаатын үллэһиннэ.
“Малая родина – сила России” бүтүн Арассыыйатааҕы муниципальнай пуорум ахсынньы 12 күнүгэр диэри ыытыллар. Дэлэгээттэр Дьокуускай муниципальнай быраактыкатын кытта билсэллэр, араас сиэссийэҕэ кытталлар, куорат, чугас эргиннээҕи улуустар сүрүн эбийиэктэрин көрөллөр. Тэрээһиҥҥэ ВАРМСУ кыттыгас бэрэссэдээтэлэ, олохтоох бэйэни салайыныы сайдыытыгар РФ бэрэсидьиэнин Сэбиэтин президиумун чилиэнэ Ирина Гусева кыттар.
Саргын Скрябин хаартыската.
-
0
-
0
-
0
-
0
-
0
-
0
