Билигин Дьокуускай куорат Бааhынай ырыынагар собо эрэ дэлэй. Кытархай дьүhүннээх бэрт эмис Кэбээйи соботун киилэтин мантан 270-350 солк. атыылаhыахха сѳп.
Специалистар туоhулуулларынан, собо белогунан, сыатынан (Омега-3), битэмиининэн баай (А, В, D, С, Е), иңэмтиэлээх уонна олус туhалаах. Киниэхэ йод, фосфор, фтор, хром, магний, тимир, кальций курдук туһалаах эттиктэр уонна аминокислоталар бааллар. Ѳссѳ селеннаах буолан, искэн ыарыытыттан харыстыыр дьоhун ас. Сүрэх-тымыр ыарыылаахтарга туhата эмиэ үгүс.
Собону элбэхтик сиир дьон доруобай, чэгиэн, сэргэх, эдэр кѳрүңнээх буолаллар.
Ол да иhин сахалар былыр-былыргыттан собонон үссэнэн, ыарахан кэмнэргэ тыыннарын да ѳллѳйдѳѳн, мааны ас гынан, ѳрѳ тутан кэллэхтэрэ.
Хаhаайка барыта собону астыы үѳрүйэх. Собону мииннииллэр, хобордооххо, духуопкаҕа ыhаарылыыллар, фаршируйдууллар.
Оттон собо кэтилиэтэ биир ураты миэстэни ылар ас. Кыhын муңха бытархай соботун күүлэҕэ буочукаҕа тоңнуу хаhаанан, кэтилиэттээн сиир олус үчүгэй буолааччы.
Собону ыраастаан, үѳhүн, итиэннэ хайыыларын ылан быраҕыллар. Оттон иккитэ мясорубкаҕа эрийтэриллэр. Мааннай курууппа эбиллэр, ол собо эриллибит этин хойуннарар, холбуур. Туустаан, тугу сѳбүлүүргүнэн тумалаан баран, үчүгэйдик булкуйаҕын. Салгыы мас арыылаах хобордооххо остолобуой луосканан кутан, икки ѳттүттэн алаадьы курдук эргитэн ыhаарыланар.
Минньигэс кэтилиэт бэлэм. Иhиккэ ѳрѳhѳлүү кутан остуолга уурдаххына, ким да аккаастаммат бэртээхэй аhа. Собону сиэбэт да оҕо маннык кэтилиэти сѳбүлээн сиир — собону бэйэтин сииргэр курдук уңуохтаабаккын, харбаккын.
-
0
-
0
-
0
-
0
-
0
-
0
