Муус устар 27 күнэ – өрөспүүбүлүкэбит уопсастыбаннай-политическай олоҕор икки сабыытыйанан биллэр Саха сирин устуоруйатыгар ураты күн. 1922 сыллаахха Саха Автономнай Сэбиэскэй Социалистическай Өрөспүүбүлүкэтэ тэриллибитэ, оттон 1992 сылга Саха Өрөспүүбүлүкэтин ыстаатыһын Россия Федерациятын тэҥ бырааптаах субъегын быһыытынан быһаарбыт өрөспүүбүлүкэбит Конституцията (Төрүт Сокуона) ылыллыбыта.
Махтанан кэриэстиир, дириҥник ытыктыыр саха норуотун чулуу уолаттарын – Максим Аммосов, Платон Ойуунускай, Степан Аржаков, Исидор Барахов уонна кинилэрдиин бииргэ үлэлэспит атастарын ааттарын кытта САССӨ тэриллиитэ сибээстээх. Аптаныамыйа Саха сирин экэниэмикэтин, култууратын уонна социальнай эйгэтин сайдыытыгар төһүү күүс буолбута саарбаҕа суох.
Өрөспүүбүлүкэ күнэ барыбытын, улуу Аҕа дойдубут – Арассыйабыт патриоттарын түмэр. Бүгүн патриотизм – гражданскай эппиэтинэс, айар-тутар үлэҕэ, судаарыстыбаны бөҕөргөтүүгэ бэйэни көрдөрүү уонна, саамай сүрүнэ – Төрөөбүт дойдуну көмүскүүргэ бэлэм буолуу. Анал байыаннай операцияҕа биир дойдулаахтарбыт тулхадыйбат эр санааларын, хорсун-хоодуот быһыыларын чаҕылхай холобурдарын көрөбүт.
Өрөспүүбүлүкэ күнэ – инники кэскилгэ хайысхаламмыт, Саха сирин социальнай-экономическай уонна культурнай-духуобунай сайдыытыгар саҥа үрдэллэри ситиһэргэ туһуламмыт бырааһынньык буоларыттан үөрэбит.
Күндү доҕоттор! Эһигини Өрөспүүбүлүкэ күнүнэн эҕэрдэлиибин! Барыгытыгар дьолу, үтүөнү, доруобуйаны, инникигэ эрэли, төрөөбүт Сахабыт сирин уонна улуу дойдубут – Арассыыйабыт үтүө аатын туһугар саҥа үрдүк ситиһиилэри баҕарабын! Туругурдун Сахам сирэ, туругурдун улуу Арассыыйа! Уруй-айхал!
-
0
-
0
-
0
-
0
-
0
-
0
