Билиҥҥитэ 60 тахса сокуон барыла оҥоһулунна, онтон сороҕо бастакы ааҕыыны ааспыта. Санатан эттэххэ, 2026 с. сааскы сиэссийэҕэ Ил Түмэҥҥэ 144 нуорма-быраап аактата, ол иһигэр 53 өрөспүүбүлүкэ сокуона, онтон 5 сүрүн, 91 Ил Түмэн уурааҕа ылыныллыбыта.
Билим, култуура, үөрэх уонна доруобуйа харыстабылын салаатыгар «Саха Өрөспүүбүлүкэтигэр үөрэх туһунан» сокуоҥҥа уларыйыы киирдэ. Сокуон үөрэххэ быраабы мэктиэлиир, үөрэх сүрүн таһыма босхо буоларын хааччыйар.
«Учуутал туһунан» өрөспүүбүлүкэ сокуонугар уларыйыы киирдэ, көмө, мэктиэ уонна быраап судаарыстыбаннай үөрэх тэрилтэлэрин педагогтарыгар эрэ буолбакка, муниципальнай үөрэх үлэһиттэригэр эмиэ тарҕанар.
Учууталлары өйүүргэ РФ Бэрэсидьиэнин 2026 с. от ыйын 20 күнүгэр тахсыбыт 498 №-дээх ыйааҕар олоҕуран, өрөспүүбүлүкэ 2014 с. ахсынньы 15 күнүгэр тахсыбыт 1401-З № 359-V «Саха Өрөспүүбүлүкэтигэр үөрэх туһунан» сокуонугар уларыйыылар киириэхтэрэ. Сокуон барыла учууталлары өйүүр миэрэни хаҥатан биэриэҕэ, кинилэр судаарыстыбаннай уонна муниципальнай түмэлгэ ыйга биирдэ босхо сылдьыахтара. Үлэлэрин боппуруоһун, ол иһигэр үлэ быраабын, социальнай көмөнү быһаарарга босхо юридическай көмөнөн хааччыллыахтара.
Өрөспүүбүлүкэ доруобуйаҕа харыстабылын салаата көдьүүстээхтик үлэлиирин туһугар «Саха Өрөспүүбүлүкэтигэр нэһилиэнньэ доруобуйатын харыстааһын» туһунан сокуон саҥа эрэдээксийэтэ оҥоһуллуохтаах. Сокуон барыла эрэгийиэн айылҕата, сирэ-уота уратытын учуоттуохтаах. Аныгы федеральнай стандарт быһыытынан, сокуон барыла доруобуйа харыстабыла хаачыстыбалаах, көдьүүстээх, табыгастаах буоларын ситиһиэхтээх. Ол туһунан "Ил Түмэн" пресс-сулууспата иһитиннэрэр.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
