Оскуоланы тутуу боппуруоһун олохтоох былаас уонна Ил Түмэн уһуннук туруорсубут. Онон бу саҥа кыһа үлэҕэ киирбититтэн бөһүөлэк олохтоохторун үөрүүлэрэ муҥура суох. Оскуола билиҥҥи саҥа ирдэбилгэ толору эппиэттиир, аныгы дэниллэр техническэй оборудованиеларынан толору хааччыллыылаах. Итини тэҥэ, салгыы Аччыгый Ботуобуйаҕа тутулла турар муостаны көрдүлэр. Дьокутаат этэринэн, тутуу үмүрүйэрэ лаппа чугаһаабыт, этэҥҥэ буоллаҕына, быйыл алтынньыга, сэтинньигэ үлэҕэ киирэр туруктаах. Мииринэйгэ оробуочай сырыы түмүгүнэн ыытыллыбыт мунньахха Ил Дархан дьаһала туох-хайдах туолан иһэрин отчуоттаабыттар. Юрий Николаев этэринэн, ол тустаах дьаһаллар 90 %-нара олоххо киирбит.
Норуот дьокутаата бэлиэтээн эппитинэн Ил Дархан Айсен Николаев Алмаастаах түөлбэ улуустарын социальнай-экэнэмиичэскэй уонна экологическай өттүнэн сайыннарыыга аналлаах Ыйааҕы олоххо киллэрэр инниттэн СӨ Экэниэмикэҕэ министиэристибэтигэр 2020 сылга аҕыс тустаах улууска 1 млрд. 200 тыһ. солк. көрөллөрүгэр сорудахтаабыт. Итини тэҥэ, мунньахха Удачнай куораты, Чернышевскай бөһүөлэгин уонна Сүлдьүгээр сэлиэнньэтин гааһынан хааччыйыы боппуруоһа көрүллүбүт.
«Новай» сопхуоһу судаарыстыба бас билиитигэр көһөрүүгэ үлэ ыытылла турар эбит, ити хаамыытын Юрий Николаев бэйэтин тус хонтуруолугар ылбыт. Сүлдьүгээргэ 200 миэстэлээх саҥа хотон үлэҕэ киирэрэ лаппа чугаһаабыт. Парламентарий салгыы Светлай бөһүөлэгэр олохтоох дьаһалтаны кытта социальнай-экэнэмиичэскэй боппуруостары быһаарыста. Итини тэҥэ, Чернышевскайдааҕы балык собуодугар, Бүлүүтээҕи ГЭС-кэ сылдьан үлэһиттэри кытта көрүстэ.
Балаҕан ыйын 3 күнүгэр Юрий Николаев Мииринэй оройуонун уонна Мииринэй куорат бэрэстэбиитэллээх уорганнарын дьокутааттарын мунньаҕар кытынна уонна РФ Конституцията уларыйбытынан өрөспүүбүлүкэ сокуоннарыгар уларытыылары киллэриигэ туох этиилээхтэрин иһиттэ. Санатар буоллахха, Ил Түмэн Бэрэссэдээтэлин дьаһалынан норуот дьокутааттара атырдьах ыйын 27 күнүттэн балаҕан ыйын 4 күнүгэр диэри быыбардаммыт уокуруктарыгар командировкаларга сылдьан, РФ Конституцията уларыйбытынан СӨ сокуоннарыгар уларытыылары киллэриигэ нэһилиэнньэни кытта көрүстүлэр.
-
0
-
0
-
0
-
0
-
0
-
0
