Төһө да быһаарылла илик кыһалҕалар баалларын үрдүнэн өрөспүүбүлүкэҕэ сылгыны иитии тыа хаһаайыстыбатын биир сүрүн салаата буолар. Ол тоҕото өйдөнөр. Сылгыны иитии саха төрүт тулхадыйбат үгэһэ буолар. Былыр-былыргыттан саха баччаҕа диэри сылгыны күннээҕи олоҕор-дьаһаҕар, хаһаайыстыбатыгар быһаччы туһанан, көлүнэн кэллэҕэ. Аны туран, биэ үүтүттэн кырылыы кыынньар кымыһы оҥорон, сайын ыһыахтарга туһанар. Этин туһунан этэ да барыллыбат.
“Саха сиригэр сылгыны хото иитии дьылтан-күнтэн улахан тутулуктаах. Оттон судаарыстыбаттан сөптөөх көмө адьас дьоҕус. Ол курдук, сылгыһыт диэн идэ суох буолла, ол оннугар «хаһаайын» диэн тыл ордук туһаныллар. Аны туран, хамнас диэн эмиэ ааҕыллыбат. Тэриниилээх хаһаайыстыбаларга субсидия быһыытынан сылгы аайы 1000 солк. кэриҥэ эрэ көрүллэр. Билиҥҥи туругунан өрөспүүбүлүкэҕэ сылгы собуоттарын, базаларын балаһыанньалара син бөҕө, үчүгэй туруктаахтар. Ол курдук, СӨ Тыа хаһаайыстыбатын министиэристибэтиттэн сылгыһыттарга көмө быһыытынан грант баар. Аҕыйах сыллааҕыта өрөспүүбүлүкэҕэ сылгы базаларын тутарга аналлаах судаарыстыбаннай бырагыраама олоххо киириэҕиттэн сылгыһыттар материальнай өттүнэн бөҕөргөөтүлэр. Итинтэн сиэттэрэн, сылгыһыттар сыспай сиэллээхтэрин ахсаана элбииригэр интэриэстэрэ лаппа улаатта. Ол эрээри диирбитигэр тиийэбит. 2020 сылга сылгы базаларын тутууга бүддьүөттэн сөптөөх үп көрүллүбэтэҕэ», -- диэн кэпсээтэ.
Парламентарий сылгыны итиигэ өрөспүүбүлүкэ Ил Дарханын 2018 сыл ахсынньы 18 күнүнээҕи Тыа хаһаайыстыбатын хайысхаларын стратегическай сайыннарыы Ыйааҕар улахан эрэл баарын бэлиэтиир. Ити докумуоҥҥа ыйыллыбытынан 2024 сылга диэри өрөспүүбүлүкэ үрдүнэн 200 типовой дэниллэр сылгы базата тутуллуохтаах.
-Ил Түмэн парламена өрөспүүбүлүкэҕэ сылгыны иитии боппуруостарыгар сөптөөх болҕомтону уурар. Ол курдук, итиннэ аналлаах «төгүрүк остуоллары», мунньахтары тиһигин быспакка тэрийэн, «Сылгыны үөрүнэн итии» эрэгийиэннээҕи сокуоҥҥа бары өттүнэн сөптөөх уларытыылары киллэрдибит, - диэн норуот дьокутаата этэр.
Итиннэ эбэн этэр буоллахха, Ил Түмэн бэрэссэдээтэлэ Петр Гоголев быһаччы көҕүлээһининэн, өрөспүүбүлүкэҕэ сылгыны иитии боппуруостарыгар тустаах учуонайдары, исписэлиистэри кытары мунньах тэрийбитэ. Ол чэрчитинэн, парламент быйыл тыа хаһаайыстыбатыгар анаан ыыппыт I дэкээдэтигэр сылгыны иитии боппуруостара эмиэ киирбиттэрэ.
--Төһө да быһаарылла илик кыһалҕалар баалларын үрдүнэн сылгыны иитии салаата иннин диэки сайдар. Кэлиҥҥи кэмҥэ сылгы этин батарыыга кэккэ кыһалҕаны көрүстүбүт. Итини быһаарыыга 2019 уонна 2020 сыллааҕы бырагыраамаларга үп-харчы көрүллүбэтэҕэ. Убаһа этин атыыга таһаарыы, батарыы боппуруоһа (экспорт) бүгүҥҥү күҥҥэ быһаарылла илик. Кэлэр сылга, Саха сиригэр тыа хаһаайыстыбатын оҥорон таһаарааччыларын өйүүр механизм олоххо киирэринэн, ити боппуруос оннуттан быһаарыллыаҕа уонна ол түмүгэр барыта этэҥҥэ буоллаҕына, сылгыны иитиигэ үтүө түмүктэр көстөн барыахтарыгар эрэнэбин”, -- диэн Андрей Находкин саныытын үллэстэр.
“Российская газета” хаһыакка Владимир Таюрскай таһаарбыт матырыйаалынан оҥоһулунна.
-
0
-
0
-
0
-
0
-
0
-
0
