Ол курдук, олохтоох салайыныыга тахсыахтаах уларыйыылар, сокуоннар олоххо дьайыыларын тустарынан кини Нам нэһилиэнньэтигэр сиһилии билиһиннэрдэ.
Тэрээһиҥҥэ улуус баһылыга Юрий Слепцов, улуус дьокутааттарын Сэбиэтин бэрэссэдээтэлэ Алексей Винокуров, улуус муниципальнай тэриллиилэрин баһылыктара, оройуон уонна нэһилиэк дьокутааттарын Сэбиэттэрин чилиэннэрэ, олохтоох тэрлитэлэр салайааччылара, уопсастыбаннай тэрилтэлэр бэрэстэбиитэллэрэ, нэһилиэнньэ киэҥ араҥата кыттыыны ыллылар.
Сырыы сүрүн сыала – олохтоох салайыныыны бэрээдэктиир федеральнай сокуоҥҥа билиҥҥи уларытыылар, ону тэҥэ Саха сиригэр олохтоох салайыныы тиһигин тупсарыыга туһуламмыт саҥа өрөспүүбүлүкэ сокуонун оҥоруу туһунан нэһилиэнньэҕэ иһитиннэрии, быһаарыы.
Нам улууһун дьонун кытта көрсүһүүгэ олохтоох салайыныы сокуонун саҥа балаһыанньаларын кини сиһилии кэпсээтэ. Ону тэҥэ, мунньах кэмигэр саҥа федеральнай сокуонунан ыйыллыбыт улуус уонна нэһилиэк баһылыктарын талыы бэрээдэгэр уларытыылар сиһилии дьүүллэһилиннилэр. Итиэннэ испиикэр өрөспүүбүлүкэҕэ үлэлиир олохтоох бэйэни салайыныы таһымнарын, боломуочуйаларын тыырсыы уо.д.а. боппуруостары сиһилии сырдатта, ыйытыктарга эппиэттээтэ.
Алексей Еремеев өрөспүүбүлүкэ «бирилийээннээх саппааһын» уонна ону батарыы уратыларын, өрөспүүбүлүкэ бүддьүөтүн туругун, ол иһигэр ис кыаҕын пуондатын, анал байыаннай дьайыы бэтэрээннэригэр көмө, Донецкай Норуодунай Өрөспүүбүлүкэҕэ, чуолаан Докучаевскай куоракка өрөспүүбүлүкэ көмөтүн туһунан иһитиннэрдэ.
Ил Түмэн Бэрэссэдээтэлэ олорор дьиэ коммунальнай хаһаайыстыбатын эйгэтигэр билиҥҥи балаһыанньаны эмиэ ырытта. Үтүө холобур быһыытынан Уус Алдан улууһугар гаастааһын 100 бырыһыан түмүктэммитин бэлиэтээтэ. Атын да оройуоннарга гаастааһын үлэтэ салҕанар. Уопсайынан, 2025-2028 сылларга нэһилиэнньэлээх пууннары гаастааһын түмүгүнэн, оптимизацияны учуоттаан, 67 хочуолунайы гаас оттукка көһөрүү былааннанар диэн эттэ.
Социальнай инфраструктураны сайыннарыы – ырытыы биир сүрүн хайысхатынан буолла. Төһө да дойду экэниэмикэтэ ыарахан туруктааҕын үрдүнэн, нэһилиэктэргэ да, улуустарга да социальнай эйгэ, үөрэх саҥа тэрилтэлэрэ тэриллиэхтээхтэр диэн испиикэр бигэ санаалаах. Бу үлэ салҕанан барыаҕа.
Мунньах аһаҕас кэпсэтии халыыбынан ыытылынна. Олохтоохтор кыһалҕаларын, ол иһигэр олохтоох салайыныы реформатын боппуруостарыгар санааларын этэллэригэр толору кыах бэрилиннэ.
Модут нэһилиэгин баһылыга Ефим Гоголев улуустар уонна нэһилиэктэр баһылыктарын талыы бэрээдэгин туһунан чопчуласта. Ону кытта ОДьКХ-ны сайыннарарга көрүллэр миэрэлэр тустарынан сураста. Уопсастыбаннас бэрэстэбиитэллэрэ оскуолаҕа духуобунас уонна итэҕэл туһунан өйдөбүллэри оҕолорго иҥэрии баар буолуохтаах диэн этиини киллэрдилэр. Ону таһынан, үөрэх эйгэтигэр социальнай педагог, иитии-үөрэтии боппуруоһугар ыстаарсай баһаатай, тэрийээччи педагог курдук сүрүннүүр суолталаах идэлэр ыстааттарын кыччатымыахха диэн эттилэр. Олохтоох дьон ити эйгэҕэ өссө биир күчүмэҕэй баарын былааска биллэрдилэр. Ол курдук, улуус киинигэр 11 уһуйаан баарыттан, үһэ эрэ нуормаҕа эппиэттиир, уоннааҕылар дьиэлэрэ эргэрэн, иэннэрэ кыараҕас буолан, онно сылдьар оҕо ахсаана ирдэбил быһыытынан хааччахтанан турар.
Алексей Еремеев хас биирдии киирбит ыйытыыга ымпыктаан-чымпыктаан, судургу тылынан быһааран эппиэттээтэ
-
0
-
0
-
0
-
0
-
0
-
0
