Мунньаҕы Ханты-Мансинскай автономнай уокурук-Югра тэрийдэ. Бу уокурукка “IT-Стойбище” диэн социальнай бырайыак олоххо киирэ турар. Ол уопутун кытта РФ омуктарын дьыалаларыгар федеральнай аҕыаныстыба салайааччыта Игорь Баринов кэлэн билистэ.
ВКС көрсүһүүгэ СӨ хотугу аҕыйах ахсааннаах норуоттарын боломуочунайа Константин Роббек, Өлөөн национальнай эбэҥки улууһун баһылыга Лена Иванова, аҕыйах ахсааннаах омуктар ассоциацияларын бэрэсидьиэнэ Вячеслав Шадрин, вице-бэрэсидьиэнэ Любовь Христофорова, СӨ чукчаларын түмсүүтүн бэрэссэдээтэлэ Жанна Дьячкова, СӨ эбээннэрин сойууһун бэрэссэдээтэлин солбуйааччы Екатерина Кривошапкина, СӨ долганнарын түмсүүтүн чилиэнэ Любовь Джабраилова, СӨ эбэҥкилэрин сойууһун чилиэннэрэ Виктория Николаева, Дьулустан Сидоров кытыннылар.
Мунньах кэмигэр Ханты-Мансинскай автономнай уокурукка 2019-2020 сс. үлэлээбит “IT-Стойбище” диэн эрэгийиэннээҕи бырайыак түмүктэрин кытта билиһиннэрдилэр. Маны сэргэ хамсык кэмигэр төрүт омуктары судаарыстыбаннай өйөөһүн, көһө сылдьар нэһилиэнньэни харыстааһын, “Лукойл” хампаанньа хотугу омуктары кытта сыһыаннарын туһунан кэпсэттилэр.
Тустаах иһитиннэриилэри Ханты-Мансийскай автономнай уокурук, Ямало-Ненецкай автономнай уокурук, Хабаровскай кыраай, Чукотка автономнай уокуругун, Сахалин уобалаһын, о.д.а. эрэгийиэннэр бэрэстэбиитэллэрэ оҥордулар. СӨ Аартыка дьыалаларыгар миниистирин солбуйааччы Сергей Неустроев хотугу төрүт омуктар уутуйан олохсубут түөлбэлэригэр сибээс өҥөтүн киллэрии өрөспүүбүлүкэтээҕи уопуту сырдатта. Маныаха федеральнай аҕыаныстыба салайааччыта Саха сирин хотугу улуустарыгар аҕыйах ахсааннаах омуктар сүбэлэрин тэрийэр наадатын бэлиэтээтэ.
Мунньах кэмигэр Игорь Баринов эрэгийиэннэргэ сыыппаралааһын үлэтэ күүскэ барбытын эттэ. Ол гынан баран, төрүт омуктар олорор түөлбэлэригэр интэриниэккэ холбонуу ситэтэ суохтук барарын ыйда. Кини барыларын бүддьүөт суотугар холбуур кыаллыбатын эттэ. “Бу үлэҕэ биисинэһи күүскэ кытыннарыахха”, – диэтэ. Федеральнай салайааччы сыыппара өттүнэн тэҥэ суох буолууну туоратыы – нэһилиэнньэ олоҕун таһымын үрдэтии биир көрүҥэ буоларын тоһоҕолоото.
-
0
-
0
-
0
-
0
-
0
-
0
