Бу көрсүһүү “Кыылларга эппиэтинэстээх сыһыан уонна Арассыыйа Федерациятын кэккэ сокуоннарыгар уларытыылары киллэрэр туһунан” федеральнай сокуон 16 уонна 18 ыстатыйаларыгар уларытыылары киллэрэр туһунан» 853484-8 №-дээх федеральнай сокуон барылын бэлэмнээһин чэрчитинэн ыытылынна.
Алексей Еремеев Госдуума кэмитиэтин бэрэссээдэтэлигэр Саха Өрөспүүбүлүкэтин парламена бу хайысханан ыытар үлэтин туһунан, Ил Түмэн Сэбиэтэ бу иннинэ сокуон барылын өйөөбүтүн иһитиннэрдэ уонна анал суругу туттарда. Нина Останина Саха Сирин парламена ылынар быһаарыылара куруутун да дьоһуннаах, көнө сүрүннээх буолаллар диэн бэлиэтээн туран, махталын биллэрдэ. Түмүккэ бу сытыы боппуруоһу федеральнай таһымҥа төһө кыалларынан суһаллык быһаарарга уолдьаста диэн биир санааҕа кэллилэр.
Сокуон барыла «Кыылларга эппиэтинэстээх сыһыан уонна Арассыыйа Федерациятын кэккэ сокуоннарыгар уларытыылары киллэрэр туһунан» федеральнай сокуону Арассыыйа Федерациятын субъектара сокуону оҥорор уорганнара кыыллары приюттарга тутар уонна кыраасданнарга куттал суох буолуутун мэктиэлиир атын да быһаарыылары бэйэлэрэ ылынар боломуочуйаларын туһунан балаһыанньанан ситэрэн биэрэр соруктаах оҥоһулунна.
Санатан эттэххэ, 2024 с. от ыйын 26 күнүгэр ылыллыбыт «Саха Өрөспүүбүлүкэтигэр хаһаайына суох кыыллары (ыттары) дьаһайыы бэрээдэгин олохтуур уонна оннук дьаһаллар кэрискэлэрин быһаарар туһунан» сокуоҥҥа быстах көрөр пууҥҥа угуллубут, хаһаайына суох дьэллик ыты ким да иитэ ылбатаҕына, тутуллубута 31-с хонугар, ханнык төрүөттэргэ олоҕуран өлөрүөххэ сөбүн туһунан ыйар нуорма киллэриллибитэ. Хаһаайына суох дьэллик кыыллар (ыттар) ахсааннарын сааһылыыр уонна хаһаайына суох дьэллик ыттар саба түһүүлэртэн дьон олоҕун, доруобуйатын араҥаччылыыр инниттэн итинник нуорма олохтоммута. Ол эрээри, кыыллары көмүскээчилэр Үрдүкү суукка үҥсэннэр, дьиҥэ суоҕунан ааҕыллыбыта.
Дьэллик ыттар саба түһүүлэриттэн кыраасданнары араҥаччылыырга туһуламмыт федеральнай сокуон барылын Быһаарыы суругар күннээҕи олох көрдөрөрүнэн, хаһаайына суох дьэллик ыттары приюкка тутан, эмтээн-томтоон, чииптээн баран, үөскээбит эйгэлэригэр төттөрү ыытан кэбиһии нэһилиэнньэҕэ куттал суох буолуутун хааччыйбата диэн этиллэр.
Ол курдук, Судаарыстыбаннай Дуума Сэбиэтэ сокуон барылын Госдуумаҕа олунньу 26 күнүгэр киллэрбитэ уонна субъектарга ыыталаабыта.Ол туһунан Сэбиэт мунньаҕын түмүгүнэн Судаарыстыбаннай Дуума Бэрэссэдээтэлэ Вячеслав Володин иһитиннэрбитэ. Санаалары 15 күн устатыгар түмэллэр уонна кулун тутар 18 күнүгэр Госдуума дьокутааттарыгар бастакы ааҕыыга киллэриэхтэрэ.
Хаартыска: Ил Түмэн пресс-сулууспатын телеграм-ханаалыттан
-
1
-
0
-
0
-
0
-
0
-
0
