Былырыын 2024 сыл сэтинньи 29 - ахсынньы 1 күннэригэр Кыргыстаан Өрөспүүбүлүкэтигэр Саха Өрөспүүбүлүкэтин дэлэгээссийэтин официальнай сырыытыгар Ил Дархан Айсен Николаев Кыргызстан Өрөспүүбүлүкэтин салалтатын кытары Бишкек куоракка Кыргызстан Өрөспүүбүлүкэтин Национальнай историческай музейыгар Максим Аммосовка аналлаах бастайааннай онлайн-экспозицияны тэрийэр туһунан бүтэһиктээх сөбүлэһии оҥорсубута.
Кыргызстан Өрөспүүбүлүкэтигэр М.К. Аммосов олоҕун билиһиннэрэр бастайааннай төрүккэ олоҕурбут (тутаах) онлайн-экспозицияны оҥорор үлэни бастаан V-с ыҥырыылаах Ил Түмэн бэрэссэдээтэлэ Александр Жирков саҕалаабыта. Саха Өрөспүүбүлүкэтин Ил Дарханын уонна Кыргызстан Өрөспүүбүлүкэтин салалтатын сөбүлэҥинэн бу дьыл балаҕан ыйын 27 күнүн ааспакка тутаах онлайн-экспозицияны Кыргызстан Национальнай историческай музейыгар туруорар туһунан быһаарыы ылылынна.
Муус устар 8 күнүгэр Ил Түмэн бэрэссэдээтэлин бастакы солбуйааччыта Александр Жирков салалтатынан ыытыллыбыт тэрээһин үлэни ыытар бөлөх уочараттаах мунньаҕар онлайн-экспозицияны бэлэмнээһиҥҥэ анаммыт тэрээһиннэри дьүүллэстилэр. Александр Жирков эппитинэн, сотору кэминэн онлайн-экспозиция кэнсиэпсийэтэ бигэргэниэҕэ, салгыы муус устар бүтүүтэ Национальнай архыып пуондатыттан, норуоттар аудиовизуальнай нэһилиэстибэлэрин Киинигэр, өрөспүүбүлүкэтээҕи түмэллэргэ баар матырыйаалларга олоҕуран экспозиция маҥнайгы контена таҥыллыаҕа. Мультимедийнай экспозиция дизайнын «Мин историям» Музей комплексын үлэһиттэрэ оҥороллоругар сорудахтанна.
Бөлөх Кыргызстан Национальнай историческай музейын кытта ыкса үлэлэһэр. Бу музей үлэһиттэрэ кыттыгас онлайн-экспозицияҕа анаан кыргыыстар архыыптарыгар М.К. Аммосовка сыһыаннаах матырыйааллары хаттаан көрдүүллэр, хомуйаллар. Экспозиция кыргызтыы тиэкиһин Национальнай музей үлэһиттэрэ бэлэмниэхтэрэ.
Интерактивнай панелга ону таһынан Саха Сирин норуоттарын устуоруйатын, култууратын, Саха Өрөспүүбүлүкэтин билиҥҥитин кэпсиир информация туруоруллуоҕа. Оччотугар музей ыалдьыттара Арассыыйа биир улахан хотугу эрэгийиэнин туһунан элбэх информацияны билиэхтэрэ, көрүөхтэрэ.
Кыргызстан Өрөспүүбүлүкэтин Национальнай историческай музейыгар Максим Аммосовка аналлаах тутаах онлайн-экспозицияны арыйыы бу сыл бүтэһигэр Кыргызстан Өрөспүүбүлүкэтигэр Саха Өрөспүүбүлүкэтин Күннэрин ыытыы кэмигэр былааннанар.
Бу экспозиция кыргыз уонна саха норуоттарын икки ардыларыгар олохсуйбут уопсастыбаннай - историческай ситими бөҕөргөтүөҕэ, биһиги дойдуларбыт култуурунай-гуманитарнай бииргэ үлэлээһиннэрэ сайдыытыгар туһалаах буолуоҕа.
Тэрээһин мунньахха СӨ култуураҕа уонна духуобунай сайдыыга миниистирэ Афанасий Ноев, Кыргыстаан Өрөспүүбүлүкэтин Арассыыйа Федерациятыгар посольствотын Кэнсэлээрийэтин Дьокуускай куоракка вице-консула Нурлан Бекишев, “Мин устуоруйам” музей комплексын дириэктэрэ Дмитрий Соловьев, СӨ норуоттарын аудиовизуальнай нэһилиэстибэлэрин Национальнай киинин дириэктэрэ Степан Москвитин, СӨ Национальнай архыыбын дириэктэрин солбуйааччыта Наталья Малышева, Ем. Ярославскай аатынан хотугу норуоттар историяларын уонна култуураларын Дьокуускайдааҕы судаарыстыбаннай холбоһуктаах түмэлин дириэктэрин солбуйааччыта Александр Ховров кытыннылар, тустаах иһитиннэриилэри оҥордулар.
Мунньах түмүгүнэн боротокуол оҥоһуллан Кыргызстан Национальнай историческай музейыгар ыытылынна.
Алексей МАТВЕЕВ
Ил Тумэн пресс-сулууспата
-
0
-
0
-
0
-
0
-
0
-
0
