Бэҕэһээ Ил Түмэн бэрэссэдээтэлэ Алексей Еремеев, сис кэмитиэттэр салайааччылара Юрий Николаев, Андрей Находкин, Михаил Гуляев, Владимир Прокопьев итиэннэ Бырабыыталыыстыба Бэрэссэдээтэлин солбуйааччы Михаил Никифоров, Тыа хаһаайыстыбатын миниистирэ Александр Атласов саха сүөһүтүн сайыннарар киин базатын тутуу хаамыытын билсэ Таастаахха тахса сырыттылар. Парламент уонна бырабыыталыстыба дэлэгээссийэтин улуус баһылыга Юрий Слепцов уонна баһылыгы тыа хаһаайыстыбатын салаатыгар солбуйааччы Филипп Николаев, Таастаах нэһилиэгин баһылыга Егор Лиханов арыаллаатылар.
Кинилэр бастаан Тураҥнаах сайылыгар тутулла турар эбийиэктэри көрдүлэр-иһиттилэр. Манна бэртээхэй саха балаҕана баар буолбут, чинчийэр үлэни ыытарга аналлаах научнай стационар, 50 миэстэлээх сахалыы хотон, икки кыбартыыралаах дьиэ тутуллан бүтэн эрэллэр. Былаан быһыытынан, биир дьиэҕэ үлэһиттэр, атыныгар учуонайдар олоруохтаахтар. Ону таһынан, баанньык уонна хараас тутуллуохтаахтар.
Салгыы Таастаахха былырыын, сэтинньи ыйга, үлэҕэ киирбит комплекска сылдьан, күннээҕи үлэни-хамнаһы билистилэр, үлэһиттэри кытары көрүстүлэр итиэннэ 80 миэстэлээх иккис хотон үлэҕэ киирэр үөрүүтүн үллэһиннилэр. Бары мустубут дьону, нэһилиэк олохтоохторун бу кэрэ-бэлиэ күнүнэн уонна кэлэн иһэр Саҥа дьылынан эҕэрдэлээтилэр, саха сүөһүтүн иитэ-көрө сылдьар үлэһиттэргэ, Александр Артемьев салайааччылаах “Саха сүөһүтэ” генопуонда тэрилтэтин бары үлэһиттэригэр махтал тылларын эттилэр.
– Саха сүөһүтэ Сэбиэскэй былаас саҕана эстэ сыһан баран, 1990-с сыллардаахтан өрүттэр кирбиигэ киирбитэ. Ил Дархан Айсен Николаев, өрөспүүбүлүкэ бырабыыталыстыбата саха сүөһүтүн ахсаанын элбэтиигэ улахан болҕомтолорун уураллар, – диэтэ Алексей Еремеев итиэннэ «Саха сүөһүтэ» генопуонда тэрилтэтин үлэһитэ Андрей Аргуновка махтал суругу туттарда.
Тыа сиригэр уонна аграрнай бэлиитикэҕэ сис кэмитиэт бэрэссэдээтэлэ Андрей Находкин кэлэр 2022 сыллаах бүддьүөккэ тыа хаһаайыстыбатын салаатыгар 12 млрд солк көрүллүбүтүн туһунан кэпсээтэ. Сис кэмитиэт Бочуотунай грамотатын «Саха ынаҕа» генопуонда тэрилтэтин дириэктэрэ Александр Артемьевка уонна бу тэрилтэ үлэһиттэригэр Алексей Созоновка, Валерий Аргуновка туттартаата.
- 0
- 0
- 0
- 0
- 0
- 0