Бырагыраама сүрэх уонна тымыр ыарыыларыттан дьон ыалдьан олохтон туоруурун аҕыйатар уонна бу ыарыылары эмтээһин хаачыстыбатын үрдэтэр сыаллаах. Доруобуйа харыстабыла Елена Борисова иһитинэрбитинэн, 1№-дээх өрөспүүбүлүкэтээҕи тымыр ыарыыларын эмтиир кииҥҥэ 57 мэдэссиинэ оборудованиета үлэлиир. Бу оборудованиелары, чуолаан ИВЛ, УЗИ аппараттарын, атын диагнозтыыр оборудованиелары, ыарыһах сытар анал ороннорун, реабилтациялыыр тэриллэри 2019 с. федеральнай бүддьүөттэн көрүллүбүт 97,75 мөл. солк. суумаҕа атыылаһыллыбыт.
Быйыл Нерюнгритааҕы киин балыыһаны 108,16 мөл. солк. суумаҕа тымыр ыарыыларын эмтииргэ туһаныллар оборудованиеларынан хааччыйбыттар. 2021 сылга Ленскэй уонна Мэҥэ Хаҥалас киин балыыһаларыгар 84 мөл. солк. суумаҕа саҥа оборудование атыылаһан ыытыахтара. Ол курдук Майа бөһүөлэгин балыыһатыгар мэйии тымырдарын чинчийэр көмпүүтэринэн томограф, УЗИ аппарат уонна ИВЛ баар буолуоҕа. Бу курдук оборудованиелар Ленскэй куорат балыыһатыгар атыылаһыллыахтара.
-
0
-
0
-
0
-
0
-
0
-
0
