Улуус социальнай-экэнэмиичэскэй сайдыытыгар биир сүрүн боппуруоһу тыа хаһаайыстыбата, олохтоох аһы-үөлү оҥоруу ылар. Онон Ил Дархан Чокурдаахха аныгы тиэхиньикэнэн хааччыллыбыт балыгы астыыр дьоҕус сыах арыллар үөрүүтүн үллэстибитэ улуус олохтоохторугар улахан суолталанна.
– Саҥа сыах арыллыыта улуус инники диэки хардыылаан иһэрин кэрэһилиир, бу балык промышленноһыгар, тыа хаһаайыстыбатыгар эрэ буолбакка, социальнай сайдыыга эмиэ сыһыаннаах. Кэлэр сылга оскуоланы, олорор дьиэни-уоту тутуу салҕаныаҕа, атын да социальнай эбийиэктэри тутууга уонна уулус хомунаалынай инфраструктуратын тупсарыыга кэккэ былааннар бааллар, – диэтэ Айсен Николаев.
«Аллайыаха» аҕа ууһун общината» кэпэрэтиип салайааччыта Сергей Бережнов сыах сууккаҕа 200 киилэ балыгы астыыр (тууһуур, ыыһыыр) кыамталааҕын, бородууксуйа бастатан туран олохтоох маҕаһыыннарга удамыр сыанаҕа батарыллыаҕын эттэ. Балык сыаҕа «Саха Өрөспүүбүлүктигэр 2020-2024 сс. тыа хаһаайыстыбатын сайыннарыы уонна тыа хаһаайыстыбатын бородууксуйатын, сырье итиэннэ ас-үөл ырыынагын сүрүннээһин» бырагыраама иһинэн үлэлиир «Бултааһын уонна балык хаһаайыстыбатын комплекса» хос бырагыраама чэрчитинэн тутуллубут, онуоха кэпэрэтиипкэ өрөспүүбүлүкэ бүддьүөтүттэн 8 мөл. солк. көрүллэн, балыгы астыыр линия сыанатын 90 %-а толуйуллубут.
«Аллайыаха» аҕа ууһун общината» кэпэрэтиип 1999 сыллаахтан үлэлиир, балыктааһынан уонна бултааһынан дьарыктанар. Сыллата 300-350 туонна көмүс хатырыктааҕы хоторор диэн Ил Дархан уонна Бырабыыталыстыба пресс-сулууспата иһитиннэрэр.
Мария Васильева (ЯСИА) хаартыскаҕа түһэриилэрэ
-
0
-
0
-
0
-
0
-
0
-
0
