Экэниэмикэ

     Антонина Сахабыт сирин эмтээх отторунан кэсмиэтикэ оҥорон атыылыыр. Фирматын аата «Antuar» диэн. Бу французтуу тыл буолбатах. Ыал буолуон иннинэ Уарова диэн эбит. Аатын уонна араспаанньатын кылгатан, хата, кэрэ эйгэтигэр наһаа барсар бренди толкуйдаабыт.

   --Дьиҥэр, идэбинэн суруналыыспын. Үөрэхпин бүтэрээт, кэргэммин кытта дойдубутугар Сунтаарга барбыппыт. Тихон онно Сунтаар бөһүөлэгин Партизаннааҕы кулуубун дириэктэринэн үлэлээбитэ. Миигин Сунтаар сэлиэнньэтин баһылыга Дь.В. Никифоров дьаһалтаҕа сырдатар үлэни сүрүннүүр  исписэлииһинэн ыҥырбыта. Улуустааҕы “Сунтаар сонуннара” хаһыакка олохтоох дьаһалта үлэтин сэһэргиир балаһаны таһаарарым. Онтон букатын да “Киин” диэн туспа хаһыаты оҥорор буолбутум. Хомойуох иһин, балаһыанньа уларыйан, ити үлэбиттэн тохтообутум

 Ол сайын Антонина бастакытын Кэриэйэҕэ барар. Онтон “Missha” фирма бородууксуйатын аҕалан атыылыыр.

 -- 20 тыһыынчаҕа ылбыт табаарым хамаҕатык баран, үчүгэй дохуоту ылан, аны кэриэйдэр кэсмиэтикэлэрин атыылыыр маҕаһыыны тэриммитим. Ол гынан баран, 2015 сыллаахха доллар эмискэ улаатан, атыыһыттаан бүппүтүм. Ити кириисис, хата, миигин маннык түмүккэ аҕалбыта: “Солкуобайынан аахсар тэрилтэлэри кытта үлэлэһиэхтээх уонна бэйэм оҥорон таһаарыахтаах эбиппин” диэн. Дьэ, онон Арассыыйа собуоттарын, фабрикаларын үөрэтэн барбытым. Бары 20 тыһыынчаттан аҕыйаҕа суох табаары сакаастыыр буоллаххына эрэ үлэлэһэр усулуобуйалаахтара. Арай биир сиргэ 5 тыһыынча устуука мыыланы оҥорорго бэлэмнэрэ. Мин тута “Алаас дьэдьэнэ” диэн мыыланы оҥорторорго туруммутум. Ол гынан баран, иккис оҕобун күүтэрбин билэн, ол идиэйэм олоххо киирбэккэ хаалбыта.

Ити кэмҥэ кэргэнэ Тихон РФ Президенин Гранын ылан, Дьокуускайга босхо юридическай көмөнү оҥорор Эдэр юристар ассоциацияларын тэрийэр. Онон киин куоракка көһөн кэлэллэр. Антонина оҕолорун көрөн олорор. Ол эрээри санаата буолбакка, эмиэ атыыһыттаан көрөр да, улахан эргиэн тахсыбат.

“Бигэ бизнеһи тэринэргэ үөрэнииһикпин дуу? Билиим тиийбэт буолан, сырыы аайы “умайабын” быһыылаах” дии санаат, бэйэни сайыннарыыга, дьыалабыай толкуйга уһуйар мотивационнай кинигэлэри ааҕан, үөрэхтэргэ сылдьан  саҕалыыр. 

--Джен Синсеро илиҥҥи дойдулар муударастарыгар үөрэтэр “Ни сы” диэн кинигэтэ өйбөр-санаабар улаханнык сабыдыаллаабыта. Бэйэм күүспэр эрэнэрбэр, саарбахтаабат буоларга үчүгэй сүбэни биэрбитэ. Куттанар уонна бэйэбитин хааччахтыыр буоламмыт, туохпут да табыллыбат эбит.

Дьэ, онон кутталбын уонна саарбахтыырбын быраҕан, испэр иитиэхтээбит баҕа санаабын – кэсмиэтикэ оҥоруутун – олоххо киллэрэргэ быһаарыммытым.

Пенза собуотун кытта кэпсэтэн, химик-технологка ырысыаптары оҥорторон, сертификацияны ааһан, Саҥа дьыл иннинэ табаарбын туппутум. Ол бастакы баартыйам (“Дьол” диэн гиалуроновай сыворотка, “Таптал” кытыаннаах кириэм, “Үтүө” альгинатнай мааска, о.д.а.)  тута атыыланан бүппүтэ. Ол иһин иккистээн сакаастаабытым. Пандемия буолан, билигин сайт нөҥүө атыылыы олоробут. Кэсмиэтикэбит 299-599 солкуобай сыаналаахтар. Үөрбүтүм диэн, ылбыт дьон сөбүлээн, өссө кэлэр.

 Эфирнэй арыыны уонна гидролаты оҥорор “Альфа-эфир” оборудованиены аҕалтарыам. Оччоҕо сүрүн састаабын манна бэйэбитигэр оҥорор буолуохпут. Билиҥҥитэ 4 үлэһиттээхпин. Логотиппыт үс ойууттан турар: сардаана сибэкки –  кэрэҕэ тардыһыы, алмаас – Саха сиригэр оҥоһуллубутун бэлиэтиир, саһыл – сатабыллаах буолуу.

Тоҕо мин араас эйгэттэн чуолаан кэсмиэтикэни оҥорууну таллым? Бастатан туран, билигин бьюти-индустрия сайдан турар кэмэ. Иккиһинэн  табаар бу көрүҥүн хас эмэ сыл эргиппит уопуттаахпын. Үсүһүнэн, ийэм Маргарита Семеновна сааһын тухары наар эмтээх оту хомуйар. Тимэх оту (пижма), хатыҥ чээрэтин (чага), моонньоҕон сэбирдэҕин, кучу оту, о.д.а. мэлдьи хатаран, утах, чэй оҥостор. Ол иһин үүнээйини туһаныы туһунан өйдөбүллээхпин, миэхэ чугас эйгэ. Төрдүһүнэн, дьахтар ханнык баҕарар сааһыгар кэрэ буолуон баҕарабын. Киһи тас  дьүһүнэ тубустаҕына, ис санаата кытта үчүгэй өттүгэр салыллар, бэйэтин таптыыр буолар. Холобура, мин бэйэм дьыалабын саҕалыам иннинэ, бастаан өйбүн-санаабын уларытарга кыһаллыбытым. Онуоха бастакы уочарат тас көстүүбүттэн саҕалаабытым, ырарга туруммутум. Фитнескэ сылдьан, төрөөн олорон эбиммит ыйааһыммын быраҕан, дууһалыын чэпчээбитим, сонун сүүрээн мин олохпор киирэн эрэр сибикитин билбитим. Бэсиһинэн, тыа дьонугар сезоннай үлэни таһаараары. Эмтээх оту хомуйан, харчылаһыа этилэр буоллаҕа дии. Алтыһынан, оборудование ылан, дойдубар Кутанаҕа дуу, Хадаҥҥа дуу туруоран, кыһыннары үлэлиир кыра собуоту тэрийээри. Оччоҕо олохтоохторго үлэ миэстэтэ тахсыа, дьон хамнастаныа этэ.

 Киһи бу олоххо улахан соруктаах кэлэр:  тугу эрэ оҥорон хааллараары. Ол иһин “Мин тугунан көмөлөһүөхпүн сөбүй?” диэн ыйытыынан салайтаран олоруохтаах  эбиппит. Ситуацияны ити боппуруос нөҥүө көрдөххө, туох барыта чэпчээн, ыарахана-уустуга сүтэн хаалар эбит. Холобура, үлэҕин эбээһинэс курдук ылыммакка, эн бу тэрилтэҕэ кылааккын киллэрэ сылдьар курдук сананыахтааххын. Оччоҕо үлэҕэр күн аайы үөрэ-көтө кэлэҕин.

Харчы диэн барар-кэлэр эниэргийэ. Бүттэҕинэ да, сотору кэминэн баар буолар. Ол иһин болҕомтону бэйэни сайыннарыыга уурар оруннаах. Эн ис-тас эйгэҥ барыта кэрэ, үчүгэй буоллаҕына, тулалыыр да эйгэҥ тупсуо, барыта табыллыа.

“Тоҕо байа, сайда, кыаҕыра сатыыгын?” – диэччилэр. Оттон  байдахпына эрэ дьоҥҥо утары уунардаах буолар буоллаҕым дии. Бэйэм тиийбэт тирии, таппат тараһа буола сылдьан, туохпунан мин көмөлөһүөхпүнүй? Ол иһин бу бизнеспинэн аан дойду таһымыгар тахсар соругу туруорабын...

Анисия Иевлева.