Экэниэмикэ

--Бүтэһик дааннайынан, аан дойду үрдүнэн 16,8 мөлүйүөн киһи коронавирустаабыт. Итинтэн 600 тыһыынчаттан тахсата өлбүт. Саха сиригэр дьаҥмыт син намыраан эрэр курдук. Күҥҥэ 40-60 киһи ыалдьар. Ол эрээри букатын бүтэ-сүтэ илик. Билигин да географията кэҥии турар – улуустарга тарҕанан эрэрэ хомолтолоох. Арай, пандемия муҥутуур чыпчаалын аһардыбыт быһыылаах диэн уоскутунабыт. Онуоха кэмигэр хааччахтааһыны киллэрбиппит көмөлөстө. Ол эрээри социальнай ситимнэртэн аахтахха, биһиэхэ эрэ маннык буойуу-хаайыы баарын курдук суруйаллар эбит. Оннук буолбатах. Оннооҕор улахан куораттар харантыыҥҥа сабыллан турдахтарына, биһиги өрөспүүбүлүкэбитигэр тыын суолталаах тэрилтэлэр үлэлэрин тохтоппотохторо. Төттөрүтүн, балаһыанньатыттан көрөн, арыый көҥүл соҕустук дьаһаммыппыт. Билигин хааччахтааһыҥҥа 10 тыһыынча кэриҥэ киһи олорор. Үксэ култуура эйгэтиттэн. Тоҕо диэтэххэ, култуурунай тэрээһиннэр бобуллан, тыйаатырдар сабыллан тураллар. Саамай бүтэһик түһүмэҕинэн аһыллыахтара. Ону сэргэ спорт уонна аһылык эйгэтин үлэһиттэрэ хааччахтааһыҥҥа сылдьаллар. Ыалдьааччы ахсаана аччаан иһэр буоллаҕына, атырдьах ыйыттан сымнатыы сыыйа барыаҕа.

 Биллэн турар, бу пандемия аан дойду экэниэмикэтигэр сүҥкэн хоромньуну таһаарда. Ол курдук, чуолаан алмаас бырамыысыланнаһа улахан охсууну ылла. Ыам ыйыгар, бэс ыйыгар букатын да алмаас атыыламматаҕын тэҥэ эбит. Ол иһин оннооҕор “De Beers” курдук бөдөҥ хампаанньалар собуоттарын, рудниктарын сабан эрэллэр. Онно тэҥнээтэххэ, “АЛРОСА” балаһыанньата арыый бэтэрээнэн соҕус. Владимир Путин көрдөһүүбүтүн ылынан, РФ Бырабыыталыстыбатын сорудахтаата -- “АЛРОСА” хостообут алмааһын сорох чааһын Арассыыйа Гохранатыгар атыылаһан ылалларыгар. Бу дьаһал “АЛРОСА” 2020 сылы этэҥҥэ туорууругар, итиэннэ бүддьүөккэ харчы киирэригэр улахан көмө буолуоҕа. Ол эрээри бүддьүөккэ аҥардас “АЛРОСА” хампаанньатыттан эрэ харчы түһэр буолбатах, “Газпромтан” 8 млрд, РФ Бырабыыталыстыбатыттан 5 млрд  кэлэрэ бигэргэннэ. Өссө да атын көмөлөрү ыларга үлэлэһиэхпит, -- диир Ил дархан Айсен Николаев.