Экэниэмикэ

Хаһыат эрэдээксийэтэ ТелеТрейд кылаабынай аналитигын Марк  Гойхманы кытта кэпсэппит.

– Солкуобай үп-харчы ырыынагын “настарыанньатыттын” (балаһыанньатыттан) быһаччы тутулуктаах. Билигин үп-харчы ырыынагар улаханнык коронавирус “иккис долгуна” сабыдыаллыыр. Ааспыт нэдиэлэ саҕаланыытыгар дуоллар сыл аҥаардааҕы муҥутуур таһымыгар – 80 солк таҕыста. Ити тахсыы Нагорнай Карабах сэриитин уонна санкционнай тыл-өс күүһүрбүтүн кытта сибээстээх.

Билигин Киин Баан ыыта турар бэлиитикэтэ сөптөөх. Ол курдук, Киин Баан алтынньыга киирэн баран күннэтэ 2,9 млрд солк суумалаах валютаны атыылыы олорор. Аны РФ Бырабыытылыстыбата экспортердар счеттарын ордук валютатыгар хааччахтааһыны киллэрэн, бары онтон босхолоно сылдьаллар.

Ааспыт бээтинсэҕэ, алтынньы 2 күнүгэр, Дональд Трамп коронавируска хаптарбытын туһунан сурах тарҕанан, улахан аймалҕан таҕыста. Ити сурах сабыдыалыгар бу үүнэр иһэр нэдиэлэ устата аан дойду бүтүннүүтэ дуоллары күүскэ атыылаһыа. Ол курдук, билигин дуоллар саамай эрэллээх харчы. Трамп быыбарын хампаанньата уустугурда. Джо Байден кыайыыга эрэлэ улаатта. Өскөтүн Джо Байден кыайдаҕына, солкуобай күүскэ түһэр кутталлаах. Демократтар мэлдьи Арассыыйаны утары санкциялары күүһүрдэр туһунан туруорсаллар.

Сарсын, ол эбэтэр бэнидиэнньиккэ, алтынньы 5 күнүгэр, үп-харчы ырыынагар улахан хамсааһыннар тахсаллара сабаҕаламмат. Онон суукка устата: 1 дуоллар – 77,5-78,7 солк, 1 евро – 91,1-92,2 солк буолара күүтүллэр.

Оптуорунньукка, алтынньы 6 күнүгэр, икки суолталаах сонун киэҥ эйгэҕэ биллиэҕэ. Эмиэрикэҕэ EAI аҕыаныстыба ньиэп уонна күөх төлөн сыаналарын туһунан билгэтэ уонна Арассыыйа балаҕан ыйдааҕы инфляциятын туһунан дааннайдар тахсыахтара. Урутаан эттэххэ, ааспыт ыйга инфляция 3,7 % үрдээбит. Атырдьах ыйыгар – 3,6% эбит. Онон ити көрдөрүү солкуобай салгыы мөлтүүрүгэр төрүөт биэрэр.

Средаҕа, алтынньы 7 күнүгэр, АХШ ньиэбин саппааһын туһунан иһитиннэрии, ФРС мунньаҕын боротокуола биллиэхтэрэ. Ити ньиэп сыанатыгар уонна дуоллар куурсугар күүскэ сабыдыаллыаҕа.

Чэппиэргэ, алтынньы 8 күнүгэр, Дьобуруопа Киин Баанын иһитиннэриилэрэ тахсыахтара. Ол түмүгэр, евро үрдүөн сөп.

Онон нэдиэлэ бүтүүтэ 1 дуоллар – 76,7-79,3 солк, 1 евро – 90,1-93,2 солк тэҥнэһэллэрэ сабаҕаланар.

Ити курдук, сыл бүтүөр диэри солкуобай аан дойдуну кытта тэҥҥэ уларыйа турар чинчилээх.

Урутаан сабаҕалааһынынан, коронавирус хамсыгын “иккис долгуна” маассабай карантиннарга тиэрдиэ суох. Ол гынан баран, аан дойдуга хамсык намыраабатаҕына, сыл бүтүүтэ 1 дуоллар – 80-85 солк тэҥнэһэр кыахтаах (бүтэһигин дуоллар куурса 85 солк 2016 сыллаахха буола сылдьыбыта).

Өскөтүн коронавирус тарҕаныыта бытаардаҕына, аан дойду экэниэмикэтэ этэҥҥэ үлэлээн саҕалаатаҕына, ньиэп сыаната түһэрин тохтоттоҕуна, солкуобай бөҕөргүөн уонна 1 дуоллар – 72-75 солк буолуон сөп.