Экэниэмикэ

Иннокентий Слепцов билигин былыргы технологиянан сиэдэрэй быһыылаах-таһаалаах миэбэл арааһын оҥорор эбит. «Сандаарар КҮН» диэн мастарыскыайыгар үлэтэ-хамнаһа ырааппыт.

— Иннокентий, мастырыскыайыҥ үлэтин туһунан кэпсээ.

— Бу мастарыскыайбын 2016 сыллаахха кирэдьиит ылан туттубутум. Киэҥ-куоҥ гына оҥорор сыаллаах этим. Онтум сыыйа 2018 сыллаахха үлэҕэ киирбитэ. Ол эрээри үчүгэй үнүстүрүмүөнэ суох үлэ тахсыа суох диэн тыраахтарбын уонна пилорамабын атыылаан туран, интернет нөҥүө биир мөлүйүөннээх үнүстүрүмүөннэри, станоктары Санкт-Петербург куораттан үлэһэн аҕалтарбытым.

— Барыта бэйэ күүһүнэн эбит дии!

— 2017-2018 сылларга Саха Өрөспүү­бүлүкэтин Ил Дарханын ыччакка туһуламмыт граныгар кыттан көрбүппүт да, хапсыбакка хаалааччыбын. Дьэ, бу былырыын эмиэ киирсэн көрүөххэ диэн, бырайыакпын уларытан баран кытынныбыт. Быйыл 1 400 000 солкуобай грант ылан, үнүстүрүмүөннэрбитин Санкт-Петербуртан аҕалтаран, үөрүүбүт муҥура суох!

— Эҕэрдэлиибин! Аны оҥоһуктарыҥ туһунан кэпсээтэххинэ?

— Миэбэл бары көрүҥүн оҥоробун. Сүрүннээн остуол, олоппос комплегын дьон сөбүлээн үлэһэр. Онон манна күүскэ ылсан үлэлээбитим ыраатта. Быһа холоон, 2018 сылтан 50-ча устууканы оҥорбутум буолуо. Дьон Инстаграм нөҥүө үлэбин-хамнаспын көрөр, үлэһэр. Үөрүөхпүт иһин, атыылаһааччыларым саҥа миэбэллэрин эмиэ миэхэ оҥорторо кэлэллэр. Бу бастыҥ сыанабыл дии саныыбын.

— Остуолларгын, олоппосторгун олус үчүгэйдик таҥан оҥорор эбиккин.

— Бу миэбэли бэс мастан былыргы технологиянан оҥоробун. Ол аата биир да тоһоҕото суох, арай, бөҕө буоллун диэн хаачыстыбаннай килиэйинэн туттарабын.

— ЛДСП буолбакка, ыраас маһынан оҥорор туох уратылааҕый?

— Массив мас буолан, көрүүгэ-харайыыга кыратык хаппырыыс миэбэл буолуон сөп. Сииктээххэ, тымныыга эбэтэр олох итиигэ турбат – хайдан, эриллэн хаалыан сөп. Тоҕо диэтэр, мас тыынар уратылаах.  Миэбэлбитин бүтүннүүтүн силигин ситэрэн, төрүт бэлэм оҥоһугу атыылаһааччыга туттарабын. Үлэспит киһи баҕатын толору учуоттаан, кырааскалаан, дьүһүнүн-бодотун, моһуонун барытын – силигин ситэрэн баран биэрэбин.

— Хайдах олоппоһу, остуолу дьон сэргиир эбитий?

— Дьон ордук маҥан өҥү сөбүлүүр. Оһуордаах систээх олоппоһу хайгыыр. Сүрүн килийиэннэрбит -- саҥа дьиэ туттан киирбит дьон уонна саҥа ыал буолбут ыччат.

— Оҥоһуктаргын да көрдөххө, эчи эриэккэһэ, кырасыабайа сүрдээх. Ууска идэтийииҥ туохтан саҕаламмытай?

— Ювелир худуоһунньук идэтигэр үөрэммитим. 2008 сыллаахха Дьокуус­кайдааҕы ойуулуур-дьүһүннүүр училищены бүтэрбитим. Бастаан үлэ уруогун учууталынан ананан, оскуолаҕа үлэлии киирбитим. Сэтинньигэ 2009 сылтан ыла кыра мастарыскыай оҥостон, урбаанньыт буолан үлэлиир эбиппин диэн быһаарыммытым. Кыра оҕо олоппоһуттан саҕалаан, дьиэ тутуутугар тиийэ араас үлэхтэргэ ылсан үлэлэһэн көрөн баран, 2016 сылтан бу билиҥҥи мастарыскыайбар толору ылсыбытым.

— Иннокентий, улахан дьиэ кэргэн хаһаайына буолаҕын. Кэргэниҥ, оҕолоруҥ үлэҕэр-хамнаскар төһө көмөлөһөллөр, өйүүллэр?

— Түөрт оҕолоохпун. Саамай өйүүр, көмө­лөһөр дьонум кэргэним, оҕолорум буолаллар. Улахан уолум онус кылаас, эр киһи үлэтин тэҥҥэ үлэлэһэр. Кыра уолум, туйах хатарааччым – улааттаҕына бу мастарыскыайы салгыы үлэлэтэр баҕалаах. Бу карантин кэмигэр базаҕа миигин кытта барсар, илии-атах буолар, көмөлөһөр.

— Мастарыскыайгар үлэһиттэрдээххин дуо?

— Уопсайа сэттэ киһини хамнастаан үлэлэтэбин.

— Инники былааҥҥын үллэстэр буоллахха?

— Былаан, биллэн турар, киэҥ. Мастарыскыайым үлэтин тэтимирдэн, оҥоһуктарбын аны маҕаһыыҥҥа туттарар баҕалаахпын.

— Иннокентий, сэргэх кэпсээниҥ иһин махтал! Оҥоһуктарбыт үйэлээх буоллуннар уонна хаһаайыттарын күн аайы үөрдэ турдуннар диэн баҕа санааҕыт туоллун! 

 Ирина Ханды