Елена Петровна – Саха Өрөспүүбүлүкэтин бочуоттаах бэтэрээнэ, Саха сирин норуотун маастара, Саха Өрөспүүбүлүкэтин култууратын туйгуна, “Хоту дойдуга үтүөтүн иһин” бэлиэ хаһаайына. Үөһээ Халыма Уһун Күөлүгэр төрөөн-үөскээн улааппыт, хоту дойду ураты тыынын иҥэриммит киһи. Кыра эрдэҕиттэн ийэлээх эбэтин кытта тэҥҥэ үтүлүк тигэрэ, түүлээҕи таҥастыыра. “Иннэлээх саптан илиитин араарбатах киһи” диэн кинини этиэххэ сөп.
Елена Петровна олоҕо култуураны кытта ыкса ситимнээх. Норуодунай тыйаатыры кытта Сэбиэскэй Сойуус куораттарынан үгүстүк айаннаабыта, уран илиитинэн нарылаан оҥорбут үлэлэрэ Москубаҕа, Санкт-Петербурга, Эстонияҕа, Финляндияҕа, Японияҕа уо.д.а. улахан быыстапкаларга турбуттара.
Дьон норуот маастара араас тиэхиньикэни, ньыманы сатабыллаахтык туһанан иистэнэрин сөҕөллөр. Бу хаартыскаларга көстөр үлэлэргэ сыалыһар балык тириититтэн, собо хатырыгыттан, хоту дойду араас булдун, куһун атахтарын тириилэриттэн, бэл диэтэр, балык уҥуоҕуттан эгэлгэ киэргэли, таҥаһы-сабы олус кичэллээхтик тикпитин көрөҕүт. Холобур, күндүөбэй, сордоҥ балыктар уҥуохтарын итигэстээх, ыраастаан-куурдан баран олору сыалыһар балык тириитигэр тигэн бүтүн суумканы, төбөҕө кэтэр добуочча улахан кээмэйдээх бастыҥаны оҥорбута быыстапкаҕа баар. Ыраахтан оҕуруо курдук көрүөххэ сөп. Ыйааһына чэпчэки. Итиэннэ, сүрүнэ, бу оҥоһуктартан хоту дойду ураты тыына илгийэр. Куоҕас көтөр баттаҕыттан, куба, анды атахтарын тириилэриттэн тигиллибит, собо хатырыгынан киэргэтиллибит уо.д.а. суумка эгэлгэтэ баар. Ону таһынан, араас түүлээхтэн соннору, тыс этэрбэстэри, сахалыы таҥастары оһуордаан-мандардаан тигэр, паннолары, хартыыналара оҥорор. “Талааннаах киһи барытыгар талааннаах” дииллэрин курдук, оннооҕор оруос отунан “Дьулуруйар Ньургун Боотур” олоҥхоттон 5 эпизоду үүт-үкчү түһэрэн, хартыына гынан таһаарбыт. Елена Петровна хотугу прикладной-декоративнай ускуустубаны, хотугу норуоттар иистэнэр ньымаларын сөргүтээччи быһыытынан сыаналанар.
Кыыһа – Мария Николаевна, ийэтин утумнаан эмиэ талааннаах маастар. Чопчулаан билиһиннэрдэххэ, СӨ уус-уран оҥоһугун маастара, “СӨ уус-уран оҥоһугун сайдыытыгар кылаатын иһин” бэлиэ хаһаайына, араас бэстибээл, күрэх, быыстапка көхтөөх кыттааччыта.
Саха Сиригэр ураты култууралаах, төрүт үгэстээх, төрөөбүт тыллаах араас омук олорор. Олор култуураларын сөргүтүүгэ, сайыннарыыга СӨ Култууратын министиэристибэтэ араас хайысхалаах үлэни ыытар.
Диана КЛЕПАНДИНА.
Хаартыскаларга Елена Большакова уонна
Мария Егорова (Большакова) үлэлэрэ.
Ааптар түһэриитэ.
-
0
-
0
-
0
-
0
-
0
-
0
