Атырдьах ыйын 4 күнүгэр - “Саха Сирин тимир суоллара» акционернай хампаанньа үлэһиттэрин идэлээх күнүгэр Беркакит -Томмот - Дьокуускай тимир суола төрүттэммитэ 50 сылын көрсө БАМ тутуутун кытта бииргэ бэлиэтэннэ. Ол курдук, БАМ уонна АЯМ устуоруйата быстыспат ситимнээҕин туһунан генеральнай дириэктэр Василий Шимохин бэйэтин эҕэрдэ тылыгар тоһоҕолоон иһитиннэрдэ.
Хампаанньата салайааччыта 2011 сылга үлэҕэ киирбит орто анал үөрэх кыһата үрдүк таһымнаах анал идэлээх выпускниктары бэлэмниирин уонна билигин кинилэри Аллараа Бэстээх тимир суолун ыстаансыйатыгар үөрэ-көтө көрсөллөрүн бэлиэтээтэ. Ол курдук, кэнники сылларга олохтоох үөрэх кыһатын выпускниктара “Саха Сирин тимир суоллара» хампаанньаҕа тепловоз машиниһа, машинист көмөлөһөөччүтэ итиэннэ силиэсэр идэтин баһылаан кыһамньылаахтык үлэлииллэр. Онуохаҕа биир үтүө холобурунан 2017 сылтан хампаанньаҕа үлэлиир инженер уонна машинист идэлээх кэргэннии Татьяна итиэннэ Софрон Варламовтар буолаллар диэн эттэ.
Муома улууһун Улахан Чыыстай нэһилиэгиттэн төрүттээх Татьяна Новосибирскайга тимир суол үлэһиттэрин бэлэмниир университеты ситиһиилээхтик бүтэрэн, үлэтин Алдан куоракка саҕалаабыт. Онтон ыал аҕа баһылыга Софрон Таатта улууһун Кыйы нэһилиэгиттэн ситимнээх ыччат Аллараа Бэстээхтээҕи орто анал үөрэх кыһатын выпускнига “тепловоз машиниһа» идэтин ылан үлэтин бастакы хардыыларын Алдан куорат тимир суолун ыстаансыйатыгар оҥорбут. Кэскиллээх исписэлииһи Тында куоракка 6 ыйдаах анал кууруска ыытан үөрэттэрбиттэр. Кэнники хампаанньа салалтата эдэр кэскиллээх үлэһиттэри таба көрөн, Татьянаны Саха Сирин тимир суоллара хампаанньаҕа үлэ харыстабылын инженеринэн, Софрону тепловоз машиниһынан аныыр.
Варламовтар дьиэ кэргэн биэс сыл олорбут, үлэлээбит уонна дьоллорун булбут Алдан куоратыгар уонна бииргэ үлэлээбит кэллиэгэлэригэр махталлара улахан. Икки кырачаан кыргыттардаах эдэр ыал Аллараа Бэстээххэ көһөн кэлэн, квартира атыылаһан, Татьяна билигин кыра оҕотунан уоппускаҕа олорор, сотору кэминэн үлэтигэр тахсар былааннаах. Онтон, Софрон ахсыс сылын ситиһиилээхтик идэтинэн үлэлиир.
Эдэр ыал үлэлии сылдьар хампаанньалара саҥа саҕалыыр исписэлиистэргэ, ыалга араас хайысхалаах көмө оҥорорун, итиэннэ хамнастара да үчүгэйин бэлиэтээн туран, Василий Шимохин салайааччылаах улахан кэллэктиипкэ махталларын аныыллар диэн суруйар "Ил Түмэн " хаһыат общественнай кэрэспэдьиэнэ Альбина Павлова.
Хаартыскалар куйаар ситимиттэн ылылыннылар
-
4
-
2
-
0
-
0
-
0
-
0
