Бу ледокол «Атомфлот» ФГУП сакааһынан түөрт аҥар сыл устата тутуллан бүттэ. Суудунаны тутуу 2020 сыл ыам ыйын 26 күнүгэр саҕаламмыта, оттон 2022 сыл сэтинньи 22 күнүгэр ууга түһэриллибитэ. Ол суолталаах тэрээһиҥҥэ Арассыыйа Бэрэсидьиэнэ Владимир Путин кыттыыны ылбыта.
«Якутия» ледокол бу иннинэ тутуллубут суудунулартан уратыта диэн, кини сэбэ-сэбиргэлэ уонна кэмпилиэккэ киирэр тэриллэрэ барыта Арассыыйаҕа оҥоһуллубуттара буолар. ОСК генеральнай дириэктэрин бастакы солбуйааччыта Андрей Бузинов бэлиэтээбитинэн, төһө да сааҥсыйалар хааччахтаабыттарын иһин, хамаанда суудунаны кэмигэр үрдүк хаачыстыбалаахтык тутан түмүктээтэ.
Ледокол куорпуһа модьу-таҕа ыстаалынан оҥоһуллан, дьэбиргэ ылларбат уонна мууһурууттан харыстыыр. Модун суудуна күүстээх күөнүнэн 3 миэтэрэ халыҥнаах мууһу тоҕута түһэн айанныыр кыахтаах. «Якутия» ядернай установкатыгар «РИТМ-200» икки уу-уулаах реактор киирэллэр, хас биирдиилэрэ ититэр кыамтата 175 МВт уонна сулууспалыыр болдьоҕо 40 сылга тиийэр.
Балтийскайдааҕы собуот генеарльнай дириэктэрэ Александр Коновалов эппитинэн, суудунаны туппут хамаанда ледоколу эксплуатациялыырга салгыы Атомфлоту кытта үлэлэһиэҕэ, саппаас чаастарынан хааччыйыаҕа уонна тиэхиньиичэскэй көрүүнү оҥоруоҕа.
Хаартыска: ФедералПресс / Анастасия Сухоросова
-
0
-
0
-
0
-
0
-
0
-
0
