Витимҥэ билигин Бодойбо-Мама учаастагар муус устар, уута кэлэр. Нүүйэ өрүскэ көмүөлэ күүскэ барар турар, бу күннэргэ төрдүгэр киириэҕэ.
Алдаҥҥа муус Кэбээйи, Уус Алдан, Томпо улуустарынан бара турар. Алдан Өлүөнэҕэ түһэр төрдүгэр кэллэ, көмүөлүн мууһун уһуна 514, суукка устата 296 км. барда. Батамай таһынан уу таһыма 678 см. (муҥутуура 1120 см.).
Амма өрүскэ мууһа Таатта улууһунан ааһа турар, аллараа кирбиитэ төрдүгэр тиийдэ. Уу таһыма Харбалаахха 656 см. (муҥутуура 1000 см.).
Бүлүү өрүһүгэр көмүөлэ Сунтаар-Бүлүү учаастагар 4 улууһунан бара турар. Аны икки-үс суукканан Кэбээйи улууһугар, төрдүгэр тиийэрэ сабаҕаланар.
Дьааҥы, Сартаҥ өрүстэргэ уу таһыма үрдүүр, ырбыыланар, Адыыча өрүһүгэр мууһун көтөхпүт, Верхоянскай куорат аннынан көмүөлэ ыам ыйын 16-19 күннэригэр сабаҕаланар.
Халыма өрүскэ көмүөлэ Магадаан уобалаһыгар Коркодон таһынан бара турар. Зырянкаҕа кэлиитэ ыам ыйын 17 күнүгэр сабаҕаланар.
Атын хоту өрүстэргэ кыһыҥҥы эрэсиим салҕанар. РФ ЫБММ Саха Сиринээҕи управлениетын иһинэн биэдэмистибэлэр икки ардыларынааҕы оперативнай бөлөхтөр Ленскэй, Уус Маайа, Чурапчы уонна Амма улуустарыгар үлэлииллэр. Халыма-1 Халыма-2 оперативнай бөлөхтөр бэлэмнэр, ыам ыйын 15 күнүгэр турунуохтара. Гидрологическай быһыыны суукканы эргиччи кэтээн көрүү оҥоһуллар, бэйэтэ көтөр ааллар туттуллаллар, Арассыыйа ЫБММ сөмөлүөттэрэ бэлэмэҥэ тураллар диэн Саха Сиринээҕи управление пресс-сулууспатын салайааччыта Ксения Рахматулина иһитиннэрэр.
Хаартыска Арассыыйа ЫБММ Саха Сиринээҕи управлениетын пресс-сулууспата
-
1
-
0
-
0
-
0
-
0
-
0
