Мунньаҕы Ил Түмэн доруобайаҕа харыстабылын сис кэмитиэтин бэрэссэдээтэлэ Светлана Давыдова ыытта. СӨ Доруобуйаҕа харыстабылын миниистирин солбуйааччы Татьяна Павлова хроническай ыарыылаах оҕо ахсаана элбээн, доруобай оҕо ахсаана биллэрдик аҕыйаан иһэрин туһунан иһитиннэрдэ. Хас биирдии оскуола аайы мэдиссиинискэй хоһу арыйарга өрөмүөн, кабинеттары лицензиялааһын ыытыллыахтаах.
СӨ Үөрэххэ уонна наукаҕа миниистирин солбуйааччы Степан Степанов иһитиннэрбитинэн, өрөспүүбүлүкэҕэ 629 оскуола баар, быраастарынан хааччыллыбыт коррекционнай интэринээттэри көҕүрэттэххэ, 586 оскуола хаалар. Кини оскуолаҕа быраас хоһо уонна процедурнай баар буолуохтааҕын туһунан эттэ. 482 оскуолаҕа медпууннар бааллар, 104 оскуолаҕа суох. Мэдиссиинискэй лицензия 86 оскуолаҕа баар.
Хаҥалас улууһун дьокутааттарын сэбиэтин бэрэссэдээтэлэ Анатолий Антонов улууска 27 оскуола баарын, гигиеническэй иитиигэ көрүллүбүт инструктордар оҕо эчэйдэҕинэ бастакы көмөнү оҥорботторун туһунан эттэ. Бырааска көрдөрүү, 03 Суһал көмөнү ыҥырыы элбии турарын билиһиннэрдэ. Ону таһынан, төрүөхтэриттэн, эбэтэр оҕо саастарыттан ыарыһах оҕо эбиллэ турарын бэлиэтээтэ, чуолаан, оҕолор ас буһарар уорганнара ыалдьар, сахарнай диабеттаахтар, анемиялаахтар. Уойбут этиргэн оҕо элбэҕэ этилиннэ. Онон оскуолаҕа оҕону сөпкө аһатарга болҕомто ууруллуохтаах.
Кини оскуолаҕа анал үөрэхтээх медиктэринэн хааччыллыы боппуруоһун быһаарарга, гигиеническэй иитии инструктордарын мэдиссиинискэй үлэһиттэр ахсааннарыгар көһөрөргө этии киллэрдэ.
Сүрүн дакылааччыттары истэн баран норуот дьокутааттара ыйытыктары биэрдилэр. Антонина Григорьева СӨ Үөрэххэ уонна наукаҕа министиэристибэтин дакылаата ситэтэ суоҕун, балаҕан ыйын 1 күнүттэн оскуола аайы мэдиссиинискэй үлэһиттэр үлэлээн баралларыгар өрөмүөн оҥорорго, усулуобуйаны бэлэмнииргэ төһө үп наадатын ыйыталаста. Билиҥҥи туругунан, оскуолалар 1/5 медпууннара суоҕун хомуруйда.
Степан Степанов оскуолаларга мэдиссиинискэй хоһу толору хааччыйарга 300 мөл. солк. наадатын тириэртэ.
Мэдиссиинискэй үлэһит тиийбэт кыһалҕатын быһаарарга Ил Түмэн бэрэссэдээтэлин солбуйааччы Александр Подголов урут биэлсэр күн аҥаара оҕолору, эбиэттэн киэһэ улахан дьону көрөрүн санатта.
Төгүрүк остуолга 500 үөрэнээччиттэн аҕыйах оҕолоох оскуолаларга мэдиссиинискэй үлэһит көрүллүбэт диэни Елена Голомарева уонна үгүс дьокутааттар, Ил Түмэн бэрэссэдээтэлин солбуйааччы Афанасий Владимиров сөбүлээбэтэхтэрин, ону утаралларын, үүнэр көлүөнэ доруобай буоларыгар усулуобуйа тэриллиэхтээҕин туһунан санааларын эттилэр.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
