Тэрээһиҥҥэ билиҥҥи кэмҥэ сытыытык турар 3 хайысханы дьүүллэстилэр - муниципальнай оройуоннар, куорат уонна тыа поселениеларын олохтоох салайыныы уорганнарыгар бэриллэр боломуочуйалар, оҥоһук өй сайдыытын уонна Кэлим куоластааһын күнүн ыытыыга бэлэмнэнии туһунан боппуруостары көрдүлэр. Бэбиэскэҕэ киирбит 3 хайысханы өрөспүүбүлүкэ бэрэстэбиитэллээх уорганнарын Сэбиэтин чилиэннэрэ киллэрбит этиилэригэр олоҕуран ылыммыттара.
Көһө сылдьар мунньахха парламент салалтата, сис кэмитиэттэр бэрэссэдээтэллэрэ, норуот дьокутааттара, СӨ Ил Дарханын уонна Бырабыыталыстыбатын Дьаһалтатын, министиэристибэлэр уонна биэдэмистибэлэр бэрэстэбиитэллэрэ , оройуоннааҕы уонна куораттааҕы Сэбиэттэр бэрэссэдээтэллэрэ, дьокутааттара кыттыыны ыллылар.
Ил Түмэн бэрэссэдээтэлэ Алексей Еремеев тэрээһини аһарыгар бэлиэтээбитин курдук, боломуочуйалары тыырыыга 33№-дээх ФС 32 ыстатыйатын 3 чааһынан салайтараллар. Испиикэр эппитинэн, бу сокуон былаан быһыытынан 2027 сыл тохсунньу 1 күнүттэн олоххо толору киириитэ саҕаланыахтааҕа биир сыл сыҕарытыллан ,2028 сыл тохсунньу 1 күнүгэр көһөрүллүбүт. Чуолаан олохтоох былаас ситимигэр боломуочуйалары тыырыыга уларытыылары киллэрии чааһынан. Онон 207 сылга билигин үлэлии турар мадьыалынан, боломуочуйаларынан салайтарыахтара. Ол да буоллар , быйылгыттан муниципальнай тэрээһиннэр баһылыктарын талыы саҥа сокуонунан ыытыллан буолла. Холобура, Нерюнгри оройуонун итиэннэ сорох тыа поселениелар баһылыктарын талыы барда. Биир сүрүн соругунан быйыл балаҕан ыйын 18,19,20 күннэригэр, үс күн устата Судаарыстыбаннай Дуума дьокутааттарын быыбарын тэрээһиннээхтик ыытыы буолар диэтэ. Быыбар урукку ньыманан, кумааҕы бюллетеннэринэн куоластааһынынан барыаҕа, электроннай, дистанционнай туттуллубат диэн чопчулаата.
СӨ Ил Дарханын уонна Бырабыыталыстыбатын Дьаһалтатын ис бэлиитикэҕэ уонна олохтоох салайыныыга Департаменын салайааччы Александр Уваров иһитиннэриитигэр өрөспүүбүлүкэҕэ икки таһымнаах олохтоох салайыныы ситимэ оннунан хаалбытын бэлиэтээтэ. Ил Түмэн олохтоох салайыныыга сис кэмитиэтин бэрэссэдээтэлэ Владимир Прокопьев билиһиннэрбитинэн, киллэриллибит барыл быһыытынан 18 боломуочуйаттан 16-тын куораттар уокуруктарыгар,15-ин толору муниципальнай оройуоннарга сыһыарыллара көрүллүбүт, ол иһигэр 2 боломуочуйаттан сороҕун (тырааныспар инфраструктуратын сайыннарыы бырагыраамаларын оҥоруу уонна бигэргэтии чааһыгар, хапытаалынай тутуу эбийиэктэрин хаарбах туруктааҕын, көтүрэр туһунан быһаарыыны ылыныы). Кини олохтоох салайыныы уонна судаарыстыбаннай былаас уорганнарын икки ардыларыгар боломуочуйалары тыырыы боппуруостара бары өртүнэн чуолкайданыахтаахтарын, үөрэтиллиэхтээхтэрин ордук чорботон эттэ. Мунньах кэмигэр салгыы боппуруостар-этиилэр чааһыгар норуот дьокутааттара, сис кэмитиэттэр бэрэссэдээтэллэрэ Вячеслав Куличкин, Андрей Николаев баһылыктары талыыга, боломуочуйалары толорууга үбү-харчыны тыырыы өртүгэр бэйэлэрин санааларын билиһиннэрбиттэрин бэлитиэххэ сөп.
Алексей Еремеев мунньах кыттыылаахтарыгар туһаайан билигин олохтоох салайыныыга боломуочуйалары биэриигэ дириҥник үөрэтии, анаалыстааһын бара турар, үбү-харчыны тыырыы чааһыгар боломуочуйалары толору судаарыстыбаннай уорганнарга биэрии үөрэтиллэр, олох-дьаһах хомунаалынай салаатыгар эмиэ итинник балаһыанньа чопчуланар диэн быһаарда. Муниципалитеттар этиилэрин, дьон санаатын билсиһэргэ уонна салгыы учуоттуурга сыаллаан бу маннык хабааннаах, көһө сылдьар, киэҥ ыҥырыылаах тэрээһиннэр ыытыллаллар диэн түмүктээтэ.
Хаартыска Ил Түмэн пресс-сулууспата
-
1
-
0
-
0
-
0
-
0
-
0
