Олохтоохтор бу салаа үлэтэ кэнники кэмҥэ тупсубутун бэлиэтээтилэр. Ол курдук Нерюнгри балыыһата саҥардылынна, Алдан, Ленскэй улуустарыгар ФАП-тар, быраас көрөр амбулаторията тутуллар, Мииринэйдээҕи киин балыыһаны өрөмүөннүүллэр уонна аныгы тиэхиньикэнэн хааччыйаллар.
Балыыһа кылаабынай быраастара үлэҕэ туох кыһалҕа баарын, ону хайдах быһаарыахха сөбүн үллэһиннилэр. Кинилэри миэстэтигэр муниципальнай былаас өрүү өйүүрүн иһитиннэрдилэр.
Иккиһинэн, офтальмологическай сулууспа туһунан кэпсэттилэр. Ааспыттааҕы кэллиэгийэттэн үс сыллаах үлэ түмүгүн таһаардылар. Харахха эппэрээһийэ 30% эбиллибит, быраастар улуустарга тиийэн ону оҥороллоро этилиннэ, сүүһүнэн тыһыынча киһи эмтэммит. Ону таһынан, Саха Сирин соҕуруу эҥээригэр саҥа салаалары арыйбыттар, хараҕы эмтииргэ саҥа ньыманы киллэрбиттэр.
Ил Түмэн дьокутаата, Дьокуускайга баар өрөспүүбүлүкэтээҕи офтальмологическай клиническэй балыыһа кылаабынай бырааһа Иван Луцкан биир идэлээхтэригэр оҥоһуу өй көмөтүнэн үлэлиир телемэдиссиинэ киинин арыйыыны өйүүллэригэр эттэ. «Оччотугар ыраах Аартыка улуустарыгар харах бырааһа тиийбэт кыһалҕатын кыччатан, итиэннэ молекулярнай-генетическэй лабаратыарыйаны тэрийэн, инникитин харах ыарыытын чинчийэр уонна эмтиир Аартыкатааҕы кииҥҥэ диэри сайыннаран таһаарыахха сөп. Арассыыйа хотугулуу илин өттүгэр маннык билим киинэ сүрүн тирэх буолуон сөп», — диэтэ кини.
Иван Луцкан СӨ Доруобуйаҕа харыстабылын министиэристибэтигэр, мэдиссиинэ тэрилтэлэрин кылаабынай быраастарыгар кини этиилэрин өйөөбүттэригэр, үлэ түмүгүн үрдүктүк сыаналаабыттарыгар махтанна. Кэлэр биэс сылга Саха Сирин офтальмологическай сулууспатын саҥа ситиһиилэр уонна кыайыылар күүтэллэригэр эрэлин биллэрдэ, ону ситиһэргэ кэлэктиип туруоруллубут соругу этэҥҥэ кыайа-хото тутан иһэригэр баҕарда. Ол туһунан кини социальнай ситимигэр иһитиннэрдэ.
Хаартыска: Иван Луцкан социальнай ситимиттэн.
-
0
-
0
-
0
-
0
-
0
-
0
