«Тыа сирин олохтоохторо куйаас сайын, кураан күннэр от бэлэмнээһинигэр ыарахаттары үөскэппиттэрин туһунан чаастатык этинэллэр», — диэбит Айсен Николаев. Кини Бырабыыталыстыбаҕа туһаайан сүөһү аһылыгын бэлэмнээһиҥҥэ наадалаах бары миэрэлэри ылалларыгар, тыа хаһаайыстыбатыгар үлэлиир дьоҥҥо көмөлөһөллөрүгэр сорудахтаата. Ону таһынан, СӨ Ил Дархана Айсен Николаев «Кураанынан сибээстээн, өрөспүүбүлүкэ 10 оройуонугар уонна Дьокуускай куоракка ыксаллаах быһыы-майгы эрэһиимин киллэрии туһунан» от ыйын 29 күнүнээҕи 1119 №-дээх Ыйаахха илии баттаата. Өрөспүүбүлүкэ оройуоннарыгар нэһилиэнньэлээх пууннартан 60-тан тахса км ыраах сытар оттуур ходуһаларга мобильнай биригээдэлэр тэриллиэхтэрэ. Ыраах оттуур ходуһаларга 33,5 тыһ.тахса туонна от бэлэмнэниэҕэ.
Санатар буоллахха, от ыйын ортотугар өрөспүүбүлүкэ үрдүнэн 9478 гектар иэннээх сир охсуллубута, 3425 туонна от кэбиһиллибитэ биллэр. Бу көрдөрүү былырыын баччаҕа чөкөтүллүбүт от (7292 туонна этэ) аҥаарыгар да тиийбэт. Оттон быйыл былааннаммыт 457553 туонна от 0,7 эрэ бырыһыанынан тэҥ. Мэлдьи буоларын курдук алаас сирдээх илин эҥээрдээҕи улуустар ордук оҕустардылар. Уус Алданнар былааннаабыт отторуттан 46 эрэ бырыһыанын (32805 туоннаттан 15017 туоннатын) бэйэлэрин сирдэриттэн булунарга, оттон чурапчылар 70 (36 тыһ. туоннаттан 26,2 тыһ. туоннатын), саамай улахан былааннаах (42698 туонна) уонна саамай кыра, кыараҕас сирдээх мэҥэ хаҥаластар 75 бырыһыаҥҥа суоттаналлар.
Өрүс эҥээрдээх Амма уонна Таатта отчуттара былааннаммыттан 5-тии тыһ. туонна кэриҥэ итэҕэс оттонуохпут диэн сабаҕалыыллар. Бэл, улуу Өлүөнэ эбэ хочолоругар, арыыларыгар оттуур улуустарга бөрүкүтэ суох сонуннаахтар: Хаҥаласка 32606-тан 25507 туоннатын, Намҥа 28473-тэн 24016 туоннатын бэйэ сиригэр-уотугар бэлэмнииргэ суоттанан олороллор. Саха сирин Украинатынан ааттанар өҥ буордаах Өлүөхүмэҕэ 16798 туонна оту быһа охсорго былааннаабыттарыттан, сирдэрэ-уоттара курааҥҥа хаарыйтаран, 10,6 тыһыынчатын булунар туруктаахтар.
Сунтаарга 34025 туонна от былааннаахтарыттан 23236 туоннатын, Ньурбаҕа 33359 туоннаттан 20795 эрэ туоннатын оттуурга сабаҕалаан олороллор. Арай, ыаллыы Үөһээ Бүлүүгэ 24 тыһ. туоннаттан 23153 туоннатын, Бүлүүгэ 27,3 тыһ. туоннаттан 25 тыһ. туонна кэриҥин быһа дайбыырга эрэллээхтэр.
От ыйын 29 күнүнээҕи туругунан, сүөһү аһылыгын бэлэмнээһин хампаанньатын хаамытын туһунан СӨ Бырабыыталыстыбатын солбуйааччыта Михаил Никифоров сиһилии билиһиннэрдэ:
-
0
-
0
-
0
-
0
-
0
-
0
