Испэктээк Сахабыт Сиригэр бу дьыл олунньу ыйыгар онлайн киэбинэн киэҥ дьүүлгэ тахсыбыта. Бастакы көрөөччүлэр – АГИКИ уонна М.К.Аммосов аатынан ХИФУ устудьуоннара Кинилэр артыыстары, айар бөлөҕү кытта атах тэпсэн олорон, санаа атастастылар, ыйытыы биэрэн, хоруй ыллылар.
Туруорааччы-режиссер Василий Борисов, пьесаны Марфа Семенованы кытта нууччалыыттан сахалыы тылбаастаабыт М.К.Аммосов аатынан ХИФУ магистрана, филология наукатын хандьыдаата Яков Титов, Саха театрын литературнай чааһын сэбиэдиссэйэ Ангелла Попова, испэктээк сүрүн геройдара – Арассыыйа уонна Саха Өрөспүүбүлүкэтин үтүөлээх артыыската Елена Сергеева-Румянцева, Арассыыйа үтүөлээх, СӨ норуодунай артыыһа Петр Баснаев кэпсэтии тула олус элэккэйдик бэйэлэрин санааларын эттилэр, айымньы сүрүн идиэйэтин, көрдөрөр кэмин, уобарастарын тула сиһилээтилэр.
Култуура уонна ускуустуба эйгэтигэр уһуйуллар маҥнайгы куурус устудьуоннара артыыстары «тутан олорон» сэһэргэһиини олус сонурҕаатылар. Төһө да сэрэнэн, аргыый ыйытыылары биэрдэллэр, көрсүһүүттэн олус астыммыттарын, оонньууларга салгыы сылдьар баҕалаахтарын биллэрдилэр.
П.А.Ойуунускай аатынан Саха академическай театрын салалтатын аатыттан тэрээһини көҕүлээбит, иилээн-саҕалаан ыыппыт киһибитигэр Надежда Осиповаҕа махталбытын тиэрдэбит.
-
1
-
0
-
0
-
0
-
0
-
0
