Бу туһунан култуура министиэристибэтэ тугу да эппэт. Арааһа, ыам ыйын тиһэх чыыһылатын кэтэһэр. Коронавирус ыарыы куйаас күннэргэ күрэниэ диэн бары эрэнэ күүтэрбит оруннаах.
Ол да буоллар былааннаммыт үлэлэр тохтообокко бара тураллар. Быйыл Олоҥхо ыһыаҕа Өлүөхүмэҕэ ыытыллыахтаах. Ол чэрчитинэн Аанньаах хочотугар этнографическай комплекс тутуутун уонна ипподром оҥоһуутун үгэнэ. Тутуулар былаан быһыытынан бэс ыйын 15 күнүгэр бүтүөхтээхтэр.
«Дизайн-уран» тэрилтэ тутааччылара баараҕай оҥоһуктарын туруоруу түмүктүүр түһүмэҕэр тиийбиттэр. Ол курдук, уон сэттэ миэтэрэ үрдүктээх Аал Луук мас монтажтанара хаалбыт. Уота-күөһэ уонна атын да араас киэргэтиитэ кэллэҕинэ, силигин ситэр.
Ыһыах – саха норуотун саамай таптыыр бырааһынньыга. Самаан сайын кэлбитин уруйдуур, кыстыгы этэҥҥэ туораан, Үрдүк Айыыларга сүгүрүйэр, махтанар кэм. Былыр ыһыах көр-нар буолбатах этэ. Дириҥ сакральнай суолталаах, айылҕаны кытта алтыһар, дьону-сэргэни түмэр ураты айылгылааҕа.
-
0
-
0
-
0
-
0
-
0
-
0
