Бу сылын аайы туттарыллар бириэмийэ Саха Өрөспүүбүлүкэтин Президенын уурааҕынан 2005 сыллаахха олохтоммута. Бириэмийэ хас да номинацияҕа олохтоммута.
Үөрүүлээх түгэҥҥэ мустубут дьону Саха Өрөспүүбүлүкэтин Бырабыытылыстыбатын Бэрэссэдээтэлэ Андрей Тарасенко, Ил Түмэн бастакы вице-спикерэ Александр Жирков, өрөспүүбүлүкэ культура уонна духуобунай сайдыы миниистирэ Юрий Куприянов эҕэрдэлээтилэр.
Александр Жирков эҕэрдэ тылыгар Саха Өрөспүүбүлүкэтин Национальнай художественнай музейын кэлэктиибигэр «Саха сирин норуоттарын материальнай уонна духуобунай культурата аан дойду музейдарыгар (XII – ХХ ү.)» диэн аан дойдутааҕы бырайыагы оҥорууга өр сыллаах бииргэ үлэлэрин иһин махтанна.
Санатан эттэххэ, «Саха сирин норуоттарын материальнай уонна духуобунай культуралара аан дойду музейдарыгар (XII – ХХ ү.)» бырайыак 2006 с. А.Н. Жирков көҕүлээһининэн тэриллибитэ. 2015 с. Холбоһуктаах Нациялар Тэрилтэлэрин иһинэн аан дойдутааҕы статус ылбыта. 2017 с. тахсыбыт альбом-каталог бастакы томугар Америка Холбоһуктаах штаттарын музейдарыгар баар 1600-тан тахса музей малын-салын туһунан толору информация уонна бу экспонаттар хаартыскалара киирбиттэрэ.
Иккис уонна үһүс томнарга Германия музейдарыгар хараллан сытар музей малларын ойуулааһын киирдэ. Александр Николаевич бу аҕыйах хонуктааҕыта альбом-каталог үһүс тома күн сирин көрбүтүн иһитиннэрдэ. Бырайыак быһыытынан итинтэн салгыы альбом-каталогка аны Европа Германияттан атын дойдуларын, онтон кэлэр томнарга Российскай Федерация музейдарыгар баар Саха сириттэн төрүттээх экспонаттар мал-сал киириэхтээхтэр.
Александр Николаевич Саха Өрөспүүбүлүкэтин Аҕа Баһылыгын бириэмийэтин «Сыл бастыҥ музейа» номинациятын кыайылааҕын бэлиэтин Сэһэн Ардьакыап аатынан Уус Алданнааҕы историяны, кыраайы үөрэтэр музейын дириэктэригэр Дьулустан Заболоцкайга, Ил Түмэн Бэрэссэдээтэлин бастакы солбуйааччы Махтал суругун өр сыллаах үтүө суобастаах үлэтин иһин «Мин историям» музей-комплекс үлэһитэ Алина Алексееваҕа туттарда.
Саха Өрөспүүбүлүкэтин Аҕа Баһылыгын бириэмийэтин «Попечитель уонна меценат» номинациятын кыайылааҕын аата «Таттаавтодор» Иван Иванович Бочонинҥа тиксибитин туһунан Саха Өрөспүүбүлүкэтин Бырабыытылыстыбатын Бэрэссэдээтэлэ Андрей Тарасенко биллэрдэ.
«Музей бастыҥ үлэһитэ» номинацияны Ленскэйдээҕи историяны, кыраайы үөрэтэр музей отделын сэбиэдиссэйэ Елена Сергеевна Платоноваҕа Саха Өрөспүүбүлүкэтин культураҕа уонна духуобунай сайдыыга миниистирэ Юрий Куприянов туттарда.
Бу үөрүүлээх күн кыттыылаахтара кэнниттэн мустубут дьон музей экспозицияларын сиһилии көрөн-истэн, салгыы үлэ барылларын ырытыһан, ирэ-хоро кэпсэтэн тарҕастылар.
Ил Түмэн пресс-сулууспата
-
1
-
0
-
0
-
0
-
0
-
0
