Театрдар уонна кэнсиэри ыытыы тэрээһиннэрэ дойду регионнарын салайааччыларын быһаарыыларыгар олоҕуран кылаабынай судаарыстыбаннай санитарнай быраас этиитин учуоттаан сөргүтүллүөҕэ. Театрдарга ыарыыны утары сөптөөх дьаһаллар тутуһуллуохтаахтар, ол иһигэр репетиция, испиктээкил кэмигэр, сыанаҕа техника туруоруутугар уо.д.а. Быраабыла араас таһымнаах тэрээһиннэргэ сааһыттан тутулуга суох тарҕанар.
Көрөөччүүнү туох күүтэрий?
Биир сүрүн быраабыланан - испиктээкли уонна кэнсиэри маассабайдык сыанаҕа ыытыы бобуллар. Онон театрдар репертуардарыгар “камернай” туруоруулар төннөллөр. Роспотребнадзор кассаҕа киирии билиэт төлөбүрүн терминал эбэтэр смартфонунан ылыыны тэрийэргэ сүбэлиир. Театрга уонна кэнсиэргэ көрөөччүлэр мааскалаах кэлэллэрэ булгуччулаах, ону таһынан театр иннигэр мааска атыытын тэрийиэхтээхтэр. Театр буфеттарыгар ас атыыламмат буолар, аҥардас анал упаковкалаах уу эрэ атыыланара көҥүллэнэр. Ону таһынан көрөөччүгэ биноклу дезинфекция салфеткатын кытта туттарыахтара.
Саалаҕа көрөөччүлэри олордуу туһунан этэр буоллахха, бу боппуруос РФ Култууратын миниистирэ Ольга Любимова этэринэн, атырдьах ыйын иккис аҥарыгар ситэриллиэҕэ. «Этиилэри Роспотребнадзорга ыытыахпыт. Театрдар балаҕан ыйын ортотугар бэлэмнээхтэриттэн көрөн үлэлэрин саҕалыахтара диэн күүтэбит. Ол эрээри, биллэн турар, олохтоох былаас быһаарыытынан уонна регионнарга сүрүн судаарыстыбаннай санитарнай быраастар этиилэриттэн тутулуктаах», – диэн бэлиэтиир Ольга Любимова.
Артыыстар хайдах үлэлииллэр
Роспотребнадзор сүбэлэри артыыстарга анаан эмиэ бэлэмнээтэ. Репетицияҕа уонна испиктээкилгэ артыыстар, биллэн турар, мааската суох үлэлиэхтэрин сөп, оттон сыана уонна репетиция таһынан мааска кэтэллэригэр сүбэлиир. Бэйэ туттар эрэ гримнэниэххэ сөп, грим оҥорооччу бэрчээккэлээх үлэлиэхтээх уонна хас биирдии артыыс үлэтин кэнниттэн илиитин дезинфекциялыахтаах. Маны таһынан грим оҥорор кэккэлэһэр остуоллар 1,5 м ыраах тэйиччи туруоруллуохтаах.
Ырыаһыттар уонна этээччи артыыстар репетицияҕа 4 миэтэрэттэн итэҕэһэ суох ырааҕы тутуһуохтаахтар. Репетициялыыр саалалар тиһигин быспакка салгылатыныллыахтаах. Артыыстарга уонна театр үлэһиттэригэр смена кэмигэр мааскаларынан, дезинфекциялыыр сириэстибэлиринэн хааччыйыахтаахтар. Киириигэ үлэһиттэр илиилэрэ дезинфекцияланар уонна температуралара кээмэйдэнэр.
Оттон муусука үлэһиттэрэ
Репетиция кэмигэр муусука үлэһиттэрэ ноталары, инструменнары, уо.д.а. тэриллэри атастаһыа суохтаахтар. Муусука үлэһиттэрэ 1,5 миэтэрэ итэҕэһэ суох тэйиччи олоруохтаахтар – бу струннай бөлөх артыыстарыгар, ударниктарга, арфистарга, клавишниктарга сыһыаннаах. Оттон духуобунай инструменнар артыыстара эбии тэйиччи кэккэлэһэллэр - 2 миэтэрэ итэҕэһэ суох тэйиччи буолуохтаах. Инструменнар иннилэригэр, Роспотребнадзор сүбэтинэн, көмүскэнэр экраннар туруоруллуохтаахтар. Хас биирдии бөлөҕүнэн 1,5 миэтэрэ тэйиччи пультар туруоруллуохтаахтар. Дирижер уонна артыыстар икки ардыларыгар репетиция кэмигэр 2 миэтэрэ итэҕэһэ суох ыраах, оттон кэнсиэркэ 1,5 миэтэр итэҕэһэ суох олоруохтаахтар. Хас ахсын репетиция кэннэ муусука үлэһиттэрин олорор миэстэлэрэ дезинфекцияланыахтаах.
Саха сирин театрдара балаҕан ыйын ортото театр сезонун арыйыыны сыыйа саҕалыыр былааннаахтар.
-
0
-
0
-
0
-
0
-
0
-
0
