Бу киинэ Саха тыйаатырын кылаабынай режиссерун, туруорааччы режиссерун Сергей Потапов сыана кэтэҕинээҕи олоҕун, дьиэ кэргэнин, дьоҥҥо, олоххо сыһыанын көрдөрөр.
Ол саҕана отутун да туола илик эдэр киһи салайааччытыгар киирэн: «Мин испэктээк туруоруохпун уонна «Көмүс мааска» бириэмийэни ылыахпын баҕарабын», — диэн соһуппут. Сергей туруоруммут сыалын ситиһэн, «Макбет» аан дойду үрдүнэн аатырбыт айымньыны туруоран, 2005 с. уһулуччу үрдүк наҕарааданы, «Көмүс маасканы» хайдах ылбытын кэпсиир. Режиссер уопсайа 100 тахса испэктээги туруоран, Арассыыйа араас куораттарын сыанатыгар таһаарбыта. Ону таһынан, киинэ устар, репетиция кэмигэр уйадыйдаҕына хараҕын уута тахсыан сөп, оччоҕо саҥата суох таһырдьа тахсарын туһунан кыбыстыбакка кэпсиир.
Киинэҕэ Потапов улахан амбицията эрэ буолбакка дьону соһутар, куруук күлэ-үөрэ сылдьар, дьээбэни сөбүлүүр, олох ыарахаттарын уустугурдубат элэккэй майгыта көстөр. Кини бу сиргэ саамай күндү хаан уонна эниэргийэ буоларын туһунан этэр. Кырдьыга даҕаны, эниэргийэлээх, ис кыахтаах, уостубат мотуордаах эрэ киһи олоҕор үгүһү ситиһэр.
Сороҕор бэйэтин Таҥараны кытта тэҥниирэ истэргэ олуона соҕус эрээри, маннык таһымнаах эрэ киһи улахан айымньыны айыан сөп диэн санааҕа кэлэҕин.
Мила Кудряшова этэринэн, «Потапов@doc» киинэ номнуо икки гран-при бириэмийэни ылла. «Аан дойду муостата» французкай бэстибээлгэ «Бастыҥ этно-док» уонна бүтүн Арассыыйатааҕы күрэххэ «Бастыҥ документальнай киинэ» түһүмэххэ кыайда. Араас куораттарынан ыытыллар бэстибээллэр кэннилэриттэн киинэни Саха НКИК көрдөрүөҕэ.
-
3
-
2
-
0
-
0
-
0
-
0
