«Земскэй учуутал» уонна «Земскэй быраас» бырагыраамаларын курдук, исписэлиис дэриэбинэҕэ эбэтэр дьоҕус куоракка үлэлии көстөҕүнэ 1 мөл.солк. суумалаах биир кэлим төлөбүрү ылар. Онтон Уһук Илиҥҥэ төлөбүр икки төгүл үрдүк — 2 мөл.солк.
СӨ култуураҕа министиэристибэтэ иһитиннэрэринэн, 2030 сылга диэри өрөспүүбүлүкэ үрдүнэн «Култуура земскэй үлэһитэ» бырагыраамаҕа кыттарга 200 кэриҥэ киһи наада. Бүгүҥҥү күҥҥэ оҕо ускуустубатын оскуолаларыгар, култуурунай сынньалаҥ кэмҥэ дьарыктанар тэрилтэлэргэ, бибилэтиэкэлэргэ, түмэллэргэ исписэлиистэр тиийбэттэр.
«Бу бырагыраама нэһилиэнньэҕэ оҥоһуллар култуурунай өҥөлөрү тупсарарга аналлаах. Эдэр уонна талааннаах исписэлиистэр олохтоох нэһилиэнньэ култуурунай олоҕун байыталлар, интэриэһинэй оҥороллор. Бу олохтоох дьоҥҥо култуурунай бырайыактарга көҕөөстөөхтүк кыттар кыаҕы биэрэр. Ону тэҥэ бу эдэр үлэһиттэр улуустартан улахан куоракка көһөллөрүн аччатар», — диэн СӨ култуураҕа министиэристибэтин организационнай-правовой үлэ, судаарыстыбаннай сулууспа уонна персоналынан салайыы салаа сүрүн исписэлииһэ Алена Тихонова эттэ.
Бырайыак сүрүн соруга — сэлиэнньэҕэ үлэлиир култуура эйгэтин исписэлиистэрин элбэтии. Бырагыраама кыттыылаахтара профильнай үрдүк үөрэх кыһатын бүтэрбит эбэтэр уопуттаах исписэлиис буолуохтарын сөп. Кинилэр хайаан да орто эбэтэр үрдүк үөрэҕи бүтэрбит буолуохтаахтар
Хаартыска СИА түһэриитэ
-
1
-
0
-
0
-
0
-
0
-
0
