Бүгүн Ил Дархан Айсен Николаев ыһыах буолуохтаах сирин-уотун тиийэн көрдө-иһиттэ уонна бырабыытылыстыбаҕа, олохтоох дьаһалтаҕа тэрээһин боппуруостарыгар сыһыаннаах сорудахтары биэрдэ.
Улуус баһылыга Владимир Поскачин үбүлүөйдээх даатаҕа уонна Олоҥхо Ыһыаҕар аналлаах хас да култуураҕа уонна итэҕэлгэ сыһыаннаах эбийиэктэр тутуулара былааннаммытын билиһиннэрдэ. Ол курдук, “Аал Луук мас”, трибуналаах киин түһүлгэ, киирии аарка, уо.д.а. тутуулар былааннаммыттар. Ону сэргэ былааҥҥа улуус киинигэр Олоҥхо дьиэтин тутуута киирбит.
Бырааһынньык сүрүн тэрээһиннэрэ Түгэхтэй, Кырбый уйата уонна Төҥүргэстээх диэн улуус кииниттэн ырааҕа суох сиргэ буолуохтаахтара былааннаммыт. Манна 2017 сыллаахха XX “Манчаары оонньууларыгар” аналлаах 1000 миэстэлээх ипподром тутуллубута.
Ил Дархан үөһээ бүлүүлэр үбүлүөйдээх Олоҥхо Ыһыаҕын 2022 сыл бэс ыйын 24-26 күннэригэр ыытыахтарын уонна ити күннэргэ “Олоҥхо сиригэр ЮНЕСКО шедеврдарын көрсүһүүлэрэ” диэн үгэскэ кубулуйбут IV норуоттар икки ардыларынааҕы бэстибээли тэрийиэхтэрин баҕаралларын өйөөтө. Бу бэстибээл 2008 сылтан ыытыллар уонна бүтүн аан дойду омуктарын нематериальнай култуурунай нэһилиэстибэлэрин шедеврдарын көрдөрөр. Ити шедеврдар ахсааннарыгар саха олоҥхото эмиэ киирэр.
Айсен Николаев бүгүҥҥү көрсүһүү кэмигэр киирбит бары этиилэри учуоттаан туран, сыл бүтүөр диэри бырааһынньык ыытыллыахтаах сирин-уотун бырайыагын оҥоруутун, ороскуотун уонна ыһыах кэмигэр туох тэрээһиннэр буолалларын чопчулууру сорудахтаата.
Санатан эттэххэ, кэлэр 5 сыл устата Олоҥхо Ыһыаҕа буолуохтаах улуустарын испиэһэгэ 2019 сыллаахха бигэргэммитэ. Ол гынан баран, коронавирус дьаҥа тарҕанан, быйыл сайын Өлүөхүмэҕэ буолуохтаах Олоҥхо Ыһыаҕа эһиилги 2021 сылга көспүтэ. Ол кэннэ ыһыахтар Үөһээ Бүлүүгэ, Өймөкөөҥҥө уонна Нерюнгрига утуу-субуу ыытыллыахтара.
-
0
-
0
-
0
-
0
-
0
-
0
