СӨ Култууратын уонна духуобунай сайдыытын миниистирэ Афанасий Ноев өрөспүүбүлүкэтээҕи Медиа-кииҥҥэ бүгүн бэчээт, араадьыйа, тэлэбиидэнньэ үлэһиттэрин ыҥыран, Култуура сылын сүрүн тэрээһиннэрин, аны сайын Кэбээйигэ буолар Олоҥхо ыһыаҕын былаанын билиһиннэрдэ. Кини айар үлэһиттэр култуура сылын сырдатарга саҥа бырайыактары олоххо киллэрэн, айымньылаахтык үлэлииллэригэр ыҥырда.
Култуураны кытта хас биирдии киһи күннээҕи олоҕор алтыһар, омугуттан, итэҕэлиттэн тутулуга суох култуура нөҥүө аан дойдуну билэр. Оруобуна 30 сыл анараа өртүгэр саха бастакы бэрэсидьиэнэ Михаил Николаев 1996 с. Сэмэн Новгородов төрөөбүт күнүгэр Ийэ тыл, сурук-бичик күнүн олохтоон, ыччат ортотугар саха тыла сүтэн-симэлийэн хаалбатын туһугар олугу уурбута.
Афанасий Ноев төгүрүк остуол тула мустубут дьоҥҥо саха халандаарыгар олоҕуран оҥоһуллубут Култуура сылын эмблематын, логотибын көрдөрдө. Аламай үрүҥ күн сардаҥалара сандаарыччы түһэн, айылҕабытын, дойдубутун сырдатан, олоҕу биэрэллэр.
Култуура сылын логотибын ааптара Анал байыаннай дьайыы бэтэрээнэ Ростислав Павлов. Кини Арассыыйа дьоруойдарын, танкист уолаттар хорсун быһыыларын туһунан «Алеша» мультфильмҥа ойуулары оҥорбута, ону «Дьоруойдар сирдэрэ РФ» патриотическай бырайыак чэрчитинэн таһаарбыттара.
Күн бүгүн Ростислав дизайн-устуудьуйаны салайан үлэлэтэр, судаарыстыбаннай дизайн, бэлиэ сайдарын туһугар сэмэй кылаатын киллэрэр.
“Култуура сардаҥаларын нөҥүө норуоппут олоҥхотун, оһуохайын, чабырҕаҕын, ырыатын-үҥкүүтүн тарҕатабыт, сайыннарабыт. Бу бэлиэ уруккуну, билиҥҥини, инникини ситимниир. Халандаар ортотугар аламай маҥан күн сылама олохпутун сырдатар, сылааһынан угуттуур, айар куту уһугуннарар аналлаах”, — диэн быһаарда миниистир.
Кини Култуура сылыгар 6 хайысханан 90 тэрээһин былааннаммытын, ону биэдэмистибэлэр икки ардыларыгар дьүүллэһии кэнниттэн Бырабыыталыстыба бэрэссэдээтэлин таһымыгар ылыныахтаахтарын туһунан эттэ.
Култуура сылын бэлиэ түгэнин быһыытынан ахсынньыга Муусука үрдүкү оскуолатын иккис уочаратын саҥа дьиэтин тутан үлэҕэ киллэриэхтэрэ. Үөрэх кыһатын «Сэттэ» хампаанньа тута сылдьар, үбүлээһин толору кээмэйэ федеральнай бүддьүөттэн оҥоһуллар.
Бэрэсидьиэн Владимир Путин 2024 с. сайын Дьокуускайга кэлэ сылдьан, Муусука үрдүкү оскуолатын тиийэн көрбүтэ уонна саҥа куорпуһу тутан бүтэрэргэ, музыкальнай үнүстүрүмүөннэри атыылаһарга федеральнай бүддьүөттэн үбү-харчыны көрөргө сорудахтаабыта.
Ону таһынан, Сайсары күөл кэрэ кытылыгар сэттэ этээстээх Эпос уонна ускуустуба Аартыкатааҕы киинин 33 000 кв.м. иэннээх улахан уораҕайа аһыллыахтаах. Тэрилтэ генеральнай дириэктэринэн РФ норуодунай артыыһа, РФ, СӨ ускуустубатын үтүөлээх диэйэтэлэ Андрей Борисов анаммыта. Манна филармония, мультимедийнай, эрэпэтииссийэлиир, сиэри-туому толорор, итиэннэ театральнай трансформер саала баар буолуоҕа.
Эпос уонна ускуустуба Аартыкатааҕы киинигэр өрөспүүбүлүкэ, Арассыыйа, аан дойду таһымнаах тэрээһиннэр, пуорумнар ыытыллыахтара.
Төгүрүк остуол кэпсэтиитин туһунан сиһилии «Ил Түмэн» хаһыат кэлэр нүөмэригэр ааҕыҥ.
СӨ Култууратын уонна духуобунай сайдыытын министиэристибэтин пресс-сулууспата хаартыскаҕа түһэриитэ.
-
0
-
0
-
0
-
0
-
0
-
0
