Өлүөхүмэ араас омук олохтоохторун иллээх-эйэлээх олоҕунан олоруу уонна үгэстэрин сүмэтин оҕолоругар, кэнэҕэски ыччаттарга тириэрдэр, хаалларар санаа сайдамнык салайар.
Кэлиҥҥи сыылларга Олоҥхо ыһыаҕар ыытыллар үгүс өрүттээх үлэ улуустарга дьон-сэргэ түмсүүлээх буоларын, ыччат дьоҕура, сатабыла уһуктуутун, умнуллубут көрүҥнэри сөргүтүүгэ болҕомто ууруллуутун, араа сэйгэҕэ үлэлиир дьон олоҥхо эйгэтигэр кэлиитин чахчы ситистэ.
Ыһыах буолар улуустарыгар «Уран» устуудьуйа салайааччыта В.В. Яроев Саха сирин араас муннуктарыттан сылдьар талааннаах уустары мунньан үлэлэтэрэ, үйэлээх тутуулары иилээн-саҕалаан ыытара хайҕаллаах. Ол курдук Өлүөхүмэ сиригэр Аанньаах хочотугар аан бастаан Бүлүү умнаһын олоҥхотугар ахтыллар Аал Дууб Хатыҥ маһы тутан туругуртулар.
Ханна да суох суон мастан тоҕус томторҕолоох тойон сэргэ анньылынна.
Бу кэккэ сылларга Олоҥхо ыһыаҕын үөрүүлээх аһыллыытыгар уонна түмүктүүр түһүмэҕэр Олоҥхо тыйаатыра сүрүн күүс буолан кэллэ. Сонун режиссерскай туруорар бөлөх быйылгы Олоҥхо ыһыаҕар Өлүөхүмэҕэ XIX үйэ саҕаланыыта олоҥхо эйгэтэ баар буола сылдьыбытын, Бүлүү умнаһын, Илин Эҥээр улуустар айанньыт олоҥхоһуттарын олоҥхолуур үгэстэрин уратытын, сүгүрйүүлээх алгыһы, кымыс иһиитин сиэрин-туомун толорорго дьулуһуо.
Олоҥхоҕо, фольклорга аналлаах элбэх бэчээтинэй бородукция таҕыста. Ол курдук профессор, ф.н.д., фольклорист В.В. Илларионов «Ийэ олоҥхоһут А.Е.Соловьев» туһунан кинигэни, фольклористар А.А. Кузьмина, А.Н. Данилова олоҥхоһут М.Т. Шараборин-Кумаарап «Куллуйа Куллустуур», «Тура төрөөбүт Дуо Бухатыыр» олоҥхолорун сурукка түһэрэн, дьоһун бэлэҕи бар дьоҥҥо утары ууннулар. Оттон Гуманитарнай чинчийии уонна Хотугу аҕыйах ахсааннаах омуктар проблемаларын института «Фольклор эвенков Олекмы», «Локальные традиции преданий эвенков Олекмы», «Эвенкийский язык для начинающих» диэн бэрт сэргэх кинигэлэри бэлэмнээн, олохтоох омуктар култуураларын интириэһиргиир дьоҥҥо чахчы бэрт бэлэх оҥордо.
Быйылгы Олоҥхо ыһыаҕар аан бастаан СӨ тас сибээскэ уонна норуоттар дьыалаларыгар министиэристибэтэ уонна, А.Е. Кулаковскай аатынан Норуоттар Доҕордоһууларын Дьиэтин өйөбүлүнэн Саха Сирин норуоттарын Ассамблеятын анал түһүлгэтэ тэриллэн үлэлиэҕэ. Бу түһүлгэ бырагарааммата олус киэҥ уонна интириэһинэй. Араас күрэхтэр, быыстапкалар, кэнсиэрдэр буолаллара күүтүллэр. Иккиһинэн Саха сирин норуоттарын фольклорун күрэҕэ буолуоҕа. Үсүһүнэн, спортка сонун сүүрээн быһыытынан эбэҥкилэр ох сааларын көрүҥэр далла мэндэтии ыытыллыаҕа.
Онон Алгыстаах Аанньаах хочотугар ыытыллар Өрөспүүбүлүкэтээҕи XIV Олоҥхо ыһыаҕар Сахабыт сирин доҕордоһуу норуоттара көхтөөхтүк кыттан, үйэҕэ умнуллубат өрөгөй, өйтөн-сүрэхтэн ааспат көмүс түгэн кэлэр кэм дьонугар кэрэ кэпсээн буолуо диэн эрэнэбит.
Мария Ларионова, “Олекма” хаһыат
-
0
-
0
-
0
-
0
-
0
-
0
