Санатан эттэххэ, билиҥҥи кэмҥэ Уопсастыбаннай палаата 66 чилиэниттэн 2/3-һэ бигэргэтиллибитэ. Кинилэр Саха Сирин муниципальнай оройуоннарын уонна куораттааҕы уокуруктарын бэрэстэбиитэллэринэн буолаллар. Палаата састаабын Ил Дархан уонна парламен, итиэннэ бу палаата чилиэннэрэ биир тэҥник бигэргэтэллэр. Саха Сирин Уопсастыбаннай палаататын 22 чилиэнэ парламент уочараттаах сессиятын кэмигэр, 2024 с. муус устар 23 күнүгэр бигэргэтиллибиттэрэ. Састаапка 11 эр киһи уонна 11 дьахтар киирбитэ, олортон 10 киһи урукку састаап чилиэннэрэ, онтон 12 киһи саҥа бэрэстэбиитэллэр буолаллар.
«Эһиги Саха Сирин Уопсастыбаннай палаататыгар киирбиккит хас биирдиигит тус үлэҕитигэр улахан уопуттааххытын, уопсастыбаннай санаа лиидэрдэрэ буоларгытын бигэргэтэр», - диэн бэлиэтиир Александр Подголов.
Аныгыскы 22 хандьыдааты үлэлиир бөлөх бигэргэтиэҕэ. Бу бөлөххө маннык уопсастыбанньыктар киирбиттэрэ: Иван Горохов, Любовь Клюкина, Сергей Сюльскай, Лена Ефремова, Николай Барамыгин.
Саха Сирин Уопсастыбаннай палаататын пленарнай мунньаҕа 2024 с. ыам ыйын 14 күнүгэр ыытыллара былааннанар. Бу мунньах кэннэ 10 күн иһинэн саҥа састаап толору хомуллуо. Саҥа састааптаах Уопсастыбаннай палаата бастакы мунньаҕын күнүттэн боломуочуйаларын үс сыллаах болдьоҕо ааҕыллыа.
«Уурайбыт састаап чилиэннэрэ кэнники сыллар усулуобуйаларын уонна ыҥырыыларын ситиһиилээхтик толордулар. Уопсастыбаннай палаата үлэтэ өрөспүүбүлүкэбит дьонун-сэргэтин уйгулаах олоҕун олохтуурга сүҥкэн оруоллаах. Тоҕо диэтэххэ, биһиги уопсастыбаҕа баар кыһалҕалары, ыйытыылары быһаарыыга нэһилиэнньэни уонна былаас уорганнарын кытары үлэлэһэбит. Иннибитигэр өссө улахан уонна интэриэһинэй үлэ күүтэр диэн бигэ эрэллээхпин», - диэн эттэ Саха Сирин Уопсастыбаннай палаататын IV састаабын бэрэссэдээтэлэ Станислав Иванов.
Бэлиэтээн эттэххэ, Саха Сирин Уопсастыбаннай палаатата гражданскай уопсастыба биир дьоһуннаах үнүстүүтүнэн буолар уонна гражданнар тыын суолталаах интэриэстэрин көдьүүстээхтик олоххо киллэрэр сыалтан, уопсастыбаннас уонна судаарыстыбаннай былаас уорганнара бииргэ үлэлииллэрин хааччыйар.
Хаартыскалар Ил Түмэн саайтыттан
-
0
-
0
-
0
-
0
-
0
-
0
