Түмэл 30 сыллаах үлэтин устата аан дойду араас муннугуттан 1700 хомуһу мунньан кэллиэксийэ оҥорбут. Түмэл пуондатыгар баар хомустар туһунан «Саха норуотун хомустара» диэн каталог-кинигэ бу күннэргэ бэчээттэнэн таҕыста. Кинигэни түмэл кэлэктиибэ эрэдээктэрдэри, тылбаасчыттары, хаартыска түһэрээччилэри кытары бииргэ үлэлээн, СӨ култууратын уонна духуобунай сайдыытын министиэристибэтэ көрбүт уонна түмэл үбүнэн, «Алмазэргиэнбанк» успуонсардаабыт харчытынан тахсыбыт.
Каталокка түмэл пуондатыгар баар 628 хомус киирбит. Ол курдук, өрөспүүбүлүкэ 21 улууһуттан уонна Дьокуускай куораттан 142 маастар хомуһа сырдатыллыбыт. Маны таһынан каталокка ким оҥорбута биллибэт 54 хомус киирбит.
Кинигэҕэ хомус туһунан иһитиннэрии тиэрминнэринэн, схемаларынан ситэриллибит, нуучча уонна английскай тылларынан суруллубут. Бу каталог уратыта диэн, XVII үйэттэн саҕалаан аныгы кэмҥэ диэри баар саха хомустара хабыллыбыттар. Каталог Хомус аан дойдутааҕы түмэлэ 30 сыллаах үлэтин уонна түмэли тэрийбит И.Е.Алексеевы-Хомус Уйбаан 80 сыллаах үбүлүөйүн көрсө тахсыбыт. Кинигэни быйыл күһүн сүрэхтиэхтэрэ. Инникитин каталог өссө икки туома бэчээттэнэн тахсара былааннанар.
-
0
-
0
-
0
-
0
-
0
-
0
