Саалаҕа тобус-толору киһи тоҕуоруста. Горнай улууһун бэрэстэбиитэллэрэ, өрөспүүбүлүкэ уопсастыбаннаһа, култуураҕа, поэзияҕа, прозаҕа сүгүрүйээччилэр муһуннулар.
Култуура миниистирэ Юрий Куприянов, Ил Түмэн дьокутаата Феодосия Габышева, Саха Сирин суруйааччыларын Сойууһун бэрэссэдээтэлэ Наталья Харлампьева, Горнай улууһун баһылыга Никита Андреев, саха норуодунай суруйааччыта, П.А. Ойуунускай аатынан литературнай музей дириэктэрэ Николай Лугинов, Софрон Петрович кыыһа, философия наукатын доктора, ХИФУ преподавателэ Вера Данилова тыл эттилэр.
Бэртээхэй ахтыы киэһэтэ ааста. Софрон, Семен Даниловтар уопсастыбаннай-бэлитиичэскэй олоххо, саха литературатын сайдыытыгар, саха омук туругуруутугар, норуоттар доҕордоһууларыгар киллэрбит сүҥкэн кылааттарын бэлиэтээн кэпсээтилэр. Онуоха маннык үтүө дьону иитэн таһаарбыт төрөппүт ийэлэрин туһунан истиҥник ахтан долгуттулар.
Эстрада театрын артыыстара “Сүрэх тэбэрин тухары” ромаҥҥа олоҕуран туруорбут мюзиклларыттан оонньоон көрдөрдүлэр.
Горнай улууһун уонна нэһилиэктэрин баһылыктара Софрон, Семен Даниловтар хоһооннорун дорҕоонноохтук аахтылар. Суруйааччылар төрөөбүт дойдуларын, Мытаахтарын, Бор алаастарын, Сиинэ үрэхтэрин хоһуйбуттарын умсугуйа иһиттибит.
Үйэлээх тэрээһин өрө көтөҕүллүү, киэн туттуу, сүгүрүйүү уонна сылаас истиҥ эйгэни түстээтэ. Бу курдук кэрэхсэбиллээх дьоммутун кэриэстиирбитин тухары саха омук самныбат саргылаах, кэлэр кэскиллээх.
-
4
-
1
-
0
-
0
-
0
-
0
