Все новости

Юрист сүбэтин – босхо

Сокуону билбэттэриттэн чуолаан тыа сирин дьоно үгүстүк эрэйдэнэллэрин, бэйэлэрин бырааптарын даҕаны кыайан туһамматтарын учуоттаан, норуот дьокутаата Павел Пинигин Чурапчытааҕы 30 №-дээх быыбардыыр учаастак быыбардааччыларын кытта ситимнээх үлэ саҥа итиэннэ бэрт көдьүүстээх хайысхатын тэрийдэ. Ол курдук, 2021 сыл балаҕан ыйын 15 күнүттэн саҕалаан, “Квадрат” юридическай тэрилтэни кытта сөбүлэҥ түһэрсэн, 30 №-дээх Чурапчытааҕы быыбардыыр уокурук нэһилиэктэрин олохтоохторугар уонна дьаһалталарыгар босхо юридическай консультация өҥөтүн тэрийбитэ. Биллэрин курдук, бу учаастакка 24 нэһилиэк киирэр, ол иһигэр Мэҥэ Хаҥалас улууһуттан – икки, Чурапчы улууһуттан – 17 уонна Таатта улууһуттан – биэс нэһилиэк.

Павел Павлович «Биир ньыгыл Арассыыйа» политическай баартыйа Саха сиринээҕи салаатын кытта үлэ уопсай хайысхатын бииргэ торумнаан, штаб приемнайыгар гражданнары кытары көрсүһэр, кинилэр кыһалҕаларын истэр. Бу үлэни норуот дьокутаатын көмөлөһөөччүтэ, юрист идэлээх Егор Попов уонна юрист Афанасий Колесов үтүө суобастаахтык сүрүннүүллэр. Кинилэр быыбардыыр уокурукка баар нэһилиэктэр дьаһалталарын нөҥүө нэһилиэнньэттэн киирэр араас хайысхалаах боппуруостары быһаараллар, ону таһынан юридическай көмөнү оҥороллор, сүбэ-ама биэрэллэр. Ол түмүгэр, ити нэһилиэктэр олохтоохторо туһааннаах боппуруостарыгар чопчу хардалары олохтоох дьаһалта уонна суотабай сибээс көмөтүнэн, онтон суругунан хардалары электроннай буоста нөҥүө ылаллар. Бэлиэтээн эттэххэ, тэрилтэлэргэ уонна биэдэмистибэлэргэ түһэриллибит сурукка официальнай харда биир ыйынан эрэ кэлэр, оттон бу юридическай консультация хардата бэрт түргэн.

-- Биһиги гражданнары кытары көрсүһэбит, юрист сүбэтин тэрийэбит, тугу үлэлээбиппитин ый аайы отчуоттуубут. Киирбит сайабылыанньа хайдах «хаамарын» быһаардахха, маннык: бастатан туран, бу сайабылыанньаларынан, этиилэринэн туһааннаах тэрилтэлэргэ норуот дьокутаатын ыйытыктара оҥоһуллаллар, көрдөһүү суруктар суруллаллар. Онтон түмүгэр сайабылыанньа суруйбут дьоҥҥо хардалар ыытыллаллар. Ыйытыктарга чуолаан куорат тэрилтэлэрэ суһаллык хардаралларын бэлиэтиир сиэрдээх. Ардыгар биһиги быыбардыыр уокурукпутугар киирбэт да нэһилиэктэртэн эмиэ ыйытыктар киирэллэр, бэл, Санкт-Петербург куораттан суругунан ыйытык кэлэн турардаах, -- диэн быһаарар норуот дьокутаатын көмөлөһөөччүтэ Егор Попов.

Сыл устата 78 ыйытык

Быйылгы 2022 сыл устатыгар, ахсынньы 20 күнүнээҕи чахчынан, юридическай сүбэҕэ 78 тылынан уонна суругунан ыйытык киирбит. Дьоннор сүрүннээн дьиэ-уот хаһаайыстыбатын, хаарбах туруктаах дьиэттэн көһөрүү, биэнсийэҕэ эрдэ тахсыы, доруобуйа харыстабылын боппуруостарын, тутуу уонна өрөмүөн хайысхаларыгар сыһыаннаах ыйытыыры биэрэллэр. Оттон эдэр ыччаттар үлэ-хамнас, олорор дьиэнэн хааччыллыы, мобилизация боппуруостарын интэриэһиргииллэр уонна ыччакка сыһыаннаах, тус сыаллаах туох бырагыраамалар баалларын итиэннэ олорго кыттарга туох ирдэнэрин тустарынан билиэхтэрин баҕараллар. Нэһилиэктэр дьаһалталара сүнньүнэн олохтоох салайыныы боппуруостарын, гаас киириитин, хочуолунайдары тутууну, быһыттары өрөмүөннээһини, спортивнай былаһааккалары тутууну интэриэһиргииллэр, спортивнай инвентардары туруорсаллар эбит.

Гражданнары кытта үлэҕэ Таатта улууһуттан -- Дэбдиргэ, Чөркөөх, Туора күөл, Мэҥэ Хаҥаластан -- Алтан, Чурапчы улууһуттан -- Алаҕар, Хадаар, Мугудай, Одьулуун нэһилиэктэрин дьаһалталара нэһилиэнньэ юридическай консультацияҕа кыттыытын сөптөөхтүк хааччыйаллар. Оттон сорох нэһилиэктэр дьаһалталара, хомойуох иһин, кэтээн көрөөччү эрэ быһыытынан сылдьалларын норуот дьокутаатын көмөлөһөөччүтэ бэлиэтиир.

Нэһилиэнньэҕэ юрист сүбэтин босхо тэрийиигэ, кыһалҕалаахтарга тустаах көмөлөрү оҥорууга ситиһиилэр суох буолбатахтар. Ол курдук, дьоҥҥо нуормаламмыт быраап аакталарын быһаарыыга, үлэни булууга, дьиэнэн-уотунан хааччыллыыга, мобилизация боппуруостарыгар, эмтэнэ-томтоно барыыга-кэлиигэ үчүгэй түмүктэр түмүллэн иһэллэр. Ити барыта үлэ саҥа хайысхата сөптөөҕүн уонна чахчы туһалааҕын, көдьүүстээҕин кэрэһилииллэр.

Махтал истиҥ тыллара

Элбэхтэн ойо тутан холобурдаатахха, Чурапчыттан, үс оҕолоох Сахаяна Геннадьевна уонна Александр Елисеевич Павлуцкайдар социальнай төлөбүр сибидиэтилистибэтин ылан саҥа дьиэлэнэр үөрүүгэ тигистилэр. Ол туһунан кинилэр маннык кэпсииллэр:

– Биһиги иккиэн оҕо эрдэхпититтэн инбэлииттэрбит. Уолаттарбыт иккиэн саҥарбат буоланнар, Дьокуускай куоракка оҕолорбутун үөрэттэрээри, кыбартыыра куортамнаан олорбуппут биэс сыл буолла. Сылтан сыл куортам сыаната ыараан иһэрэ ыарахаттары үөскэтэр. 2017 сылтан быһа «Эдэр ыалы олорор дьиэнэн хааччыйыы» диэн бырагыраамаҕа уочаракка туран баран, 2022 сылга 35 сааспыт туолан, уочараттан туоруур куттал үөскээбитэ. Бэйэбит олорор дьиэлэнэр баҕа санаабыт күдэҥҥэ көтөөрү гынан, Ил Түмэн дьокутаата Павел Пинигиҥҥэ көрдөһүү сурук суруйбуппут. Ону кини быһа гыммакка, тута болҕомтоҕо ылан, тустаах биэдэмистибэлэри кытары күүскэ үлэлээбитэ. Ол түмүгэр, дьиэ ыларбытыгар бастакы хардыыбытын оҥорорбутугар көмө буолар сэртипикээти биэрэннэр, күн бүгүн бэйэбит бас билэр дьиэлэнэн олоробут. Үөрүүбүт муҥура суох.

Чурапчы улууһугар икки уһуйаан – Дириҥнээҕи «Ыллык» уһуйаан уонна Ил Түмэн Аллараа Палататын бастакы Бэрэссэдээтэлэ А.П.Илларионов аатынан Хайахсыт орто оскуолатын оскуола иннинээҕи «Күнчээн» бөлөҕө дьоҕус тустуу мааттарын тутан үөрдүлэр.

– Кыра оҕо, сырдыкка-үтүөҕэ тардыһан, олоххо ситиһиилээх, чөл уонна чэгиэн туруктаах киһи буолан тахсарыгар көмөлөһөн, биир дойдулаахпыт, дьокутааппыт Павел Павлович уһуйаан тэриллибитэ 50 сааһын бэлиэтиир р үөрүүлээх үбүлүөйүгэр спортивнай маат бэлэхтээбитин иһин, бары үлэһиттэр, иитиллээччилэр уонна оҕолор ааттарыттан махтанабыт, – дэһэллэр «Ыллык» уһуйаан үлэһиттэрэ. – Биһиги кырачааттарбыт эт-хаан өттүнэн чэбдигирэн, элбэххэ үөрэнэн, билиигэ-көрүүгэ тардыһан, булугас өйдөөх, үчүгэй майгылаах, кэрэни сэҥээрэр, бэйэлэригэр эрэллээх дьон буолан тахсыахтара диэн эрэнэбит.

– Саҥа оскуола дьиэтэ аһыллыытынан сибээстээн, кырачаан иитиллээччилэрбит эт-хаан өттүнэн сайдыылаах дьон буола үүннүннэр диэн норуот дьокутаата, олимпийскай чемпион Павел Пинигин спортивнай маат бэлэхтээтэ. Барыбыт истиҥ махталын биллэрэн тураммыт, киниэхэ үгүс өрүттээх уопсастыбаннай үлэтигэр ситиһиилэри, чэгиэн доруобуйаны, уһун-дьолоох олоҕу баҕарабыт. Кэлэн иһэр Саҥа дьылынан эҕэрдэлиибит, – диэн Хайахсыт орто оскуолатын дириэктэрэ Федор Борисов уонна уһуйаан саастаах оҕолору иитиигэ-үөрэтиигэ кини солбуйаачыта Мотрена Илларионова суруйаллар.

Дьокуускай куорат олохтооҕо, онкология балыыһатыгар эмтэнэ сытар соҕотох ийэ уола аармыйаҕа барыытын уһаттаран үөрүүтэ-махтала улахан. Ити курдук, юридическай консультация көмөтүнэн туһаммыт уонна тус кыһалҕаларын быһаартарбыт дьоннор махталлара үгүс. Бу барыта күннэтэ үлэлээн-хамсаан, ирдэнэр докумуоннары олохтоохтук оҥорон, наадалаах сиригэр тиксэрэн, тустаахтары кытары кэпсэтэн-ипсэтэн ситиһиллэр буоллаҕа.

Сиэрдээх сыанабыл

«Биир ньыгыл Арассыыйа» политическай баартыйа Саха сиринээҕи салаатын штаба кэнники икки сылын түмүгүнэн, норуот дьокутаата Павел Пинигин уонна кини көмөлөһөөччүтэ Егор Попов үлэлэрин үрдүктүк сыаналыыр. Ол курдук, ыытыллыбыт уопсай рейтиннэргэ Павел Павлович уонна Егор Ильич инники күөҥҥэ сылдьаллара быыбардааччылары астыннарар. Ону таһынан инники өттүгэр сыал-сорук туруорар, көдьүүстээх үлэҕэ угуйар.