Бибилэтиэкэ историята 1886 сыл муус устар 9 күнүттэн саҕаламмыта. Онтон ыла олох тэтимин кытта бииргэ хардыылаан, куорат духуобунай, култуурунай олоҕор улахан сабыдыалы уонна нэһилиэнньэҕэ араас өҥөлөрү оҥорор. Аныгы тупсаҕай дьиэҕэ эдэрдиин-эмэнниин тоҕуоруһа мустан, интэриэһинэй тэрээһиннэргэ көхтөөхтүк кытталлар, ааҕыы култууратын, суолтатын үрдэтэргэ күүстээх үлэ тиһиктээхтик ыытыллар.
Кыраайы үөрэтэр бибилэтиэкэ саха төрүт үгэстэрин, тылын сайдыытыгар үгүс үлэни ыытар. Маныаха бибилэтиэкэ үлэһиттэрэ хас биирдии ааҕааччыга болҕомтолорун уураллар, ону тэҥэ “Госуслуги” портал нөҥүө оҥоһуллар араас өҥөлөргө көмөлөһөллөр.
Дьокуускайдааҕы бибилэтиэкэ ситимин дьаһалтатын уонна Дьокуускай куорат култуураҕа уонна духуобунай сайдыыга салалтатын былаанынан, үп көрүллэн, 2022 сыл атырдьах ыйын 25 күнүттэн саҕалаан өрөмүөн үлэтэ өрө күүрүүлээхтик барда. Бу дьаһалтан туора турбакка, куорат атыы-эргиэн тэрилтэлэрэ, бибилэтиэкэлэрин үлэһиттэрэ күүс-көмө буоллулар.
Бибилэтиэкэ өрөгөйдөөх аһыллыытыгар «Юником/Планета Электро» салайааччыта Инна Евгеньевна Петроваҕа, «Азбука» тэрилтэ салайааччыта Нина Васильевна Семеноваҕа махтал тыллара этилиннилэр.
Бу дьоро күнҥэ биһиги ааҕааччыларбытыттан, биир эйгэҕэ алтыһар култуура тэрилтэлэрин салайааччыларыттан, суруйааччылартан эҕэрдэлэр киирдилэр.
Кыраайы үөрэтэр бибилэтиэкэ үлэһиттэрин аатыттан күндү ааҕааччыларбытын үтүөҕэ умсугуйуҥ, сырдыкка, билиигэ-көрүүгэ дьулуһуҥ диэн ыҥырабыт, дьоллоох-соргулаах буоларгытыгар баҕарабыт!
-
2
-
0
-
0
-
0
-
0
-
0
